ملوانکه‌ی شین

ده‌زانی دڵم بۆ چی ته‌نگ بووه؟

2010-07-13T21:15:00.003+02:00

ده‌زانی دڵم بۆ چی ته‌نگ بووه‌؟ بۆ ماچێکی برا بچووکه‌که‌م که له باوه‌شی مندا گه‌وره بوو و لالاییم بۆخۆم و بۆ ئه‌و ده‌گووت ئه‌و کاتانه‌ی هه‌ردوکمان خه‌ومان ده‌هات و دایکم دیار نه‌بوو لالاییمان بۆ بڵێ

ده‌زانی دڵم بۆ چی ته‌نگ بووه‌؟ بۆ ده‌نگی قاقای بابم وا ژووره‌که‌ی پڕ ده‌کرد له پیاوی خۆش خه‌نده‌ی وه‌ک خۆی و ئه‌وه‌نده‌یان له‌سه‌ر قه‌ڵاندۆش داده‌دانم و قسه‌ی خۆشیان بۆ ده‌کردم که پێم خۆش نه‌بوو ئه‌و مه‌جلیسه‌یان ته‌واو بێ

ده‌زانی دڵم بۆ کێ ته‌نگ بووه؟ بۆ خوشکم وا نه‌مده‌توانی لێی جودا بمه‌وه‌ و بچمه قوتابخانه، نه‌مده‌توانی لێی جودا بمه‌وه‌ و بچمه ده‌بیرستانێکی دیکه، نه‌مده‌توانی لێی جودا بمه‌وه‌ و بچمه زانکۆی شارێکی تر و ئاخری وایان لێک جودا کردینه‌وه‌ که ته‌نانه‌ت ناتوانین به ساڵانیش یه‌کتر ببینین

ده‌زانی دڵم بۆ چی ته‌نگ ده‌بێ؟ بۆ گۆرانیه‌کانی سه‌ر لێوی دایم که پڕ بوون که خه‌ون و پێکه‌نینی به دزیه‌وه‌ و غه‌م و شادی و گریان،بۆ ئه‌و گۆرانیانانه‌ی شه‌رمیان له منی منداڵیش ده‌کرد و به زۆر ده‌هاتنه سه‌ر لێوی دایکی شه‌رمێونی من

دڵم بۆ منداڵی خۆم و گه‌وره‌یی براکه‌م ته‌نگ بووه‌ که نه‌متوانی بیبینم چۆن گه‌وره‌ بوو و بوو به پیاو

ئه‌وین

2009-08-02T23:35:00.003+02:00

ئارامی
ڕێز
پێکه‌نین

حه‌سانه‌وه‌

له‌گه‌ڵ تۆ

له‌ باوه‌شی تۆدا

فێر بووم.

هه‌رچه‌ند هاوڕه‌گه‌ز

هاوزمان

یان

هاو نه‌ته‌وه‌ نه‌بووین

2009-06-02T21:45:00.003+02:00

ئه‌وڕۆژانه‌ به‌ پێیان زۆر ده‌ڕۆم، رۆژانی شه‌ممه‌ و یه‌کشه‌ممه‌ نزیکه‌ی 5 کیلومێترێک ره‌نگه‌ زیاتریش بڕۆم و جاری وایه‌ نازانم سه‌رم له‌ کوێ ده‌رهێناوه‌.پیاده‌ ره‌ویم زۆر پێ خۆشه‌، هه‌ست ده‌که‌م به‌ پێیان رۆیشتن هه‌موو خه‌مه‌کانم،هه‌موو ئۆقده‌ و گرێکانی دڵ و ده‌روونم له‌ ناو جه‌سته‌م وه‌ده‌ر ده‌نێ و که‌مێم ، زۆر نا، ته‌نیا که‌مێک له‌ باره‌ قورسه‌کانی ژیانم لێ سووک ده‌کا.

حه‌وتووی پێشتر له‌ هه‌موو کلیسا گه‌وره‌کانی شار شه‌مم هه‌ڵگیرساند و گۆڵم به‌ سه‌ر چۆمی سێندا په‌ڕ په‌ڕ کرد،ئه‌و حه‌وتوویه‌ش کاتژمێرێک وه‌ک خه‌ڵکێکی دیکه‌،له‌ ده‌وری پیاوێکی روح سووکی کلۆن کۆبوومه‌وه‌ و به‌ ژێست و قسه‌کانی و ته‌ڕده‌ستیه‌کانی پێکه‌نیم

له‌ هه‌ر شه‌قامێکی پاریس تووشی شتێک ده‌بم،خه‌ڵکانێک که‌ بۆ مافی ژیوار و سروشت کۆبوونه‌وه‌ یان داوای مافی خه‌ڵکی فه‌له‌ستین ده‌که‌ن ، یان رێکلام بۆ سه‌فه‌ر و خوارده‌مه‌نی و موسیقای یونان ده‌که‌ن و یانیش پوڵ بۆ خاچی سوور کۆ ده‌که‌نوه‌ و یانیش وه‌ک ئه‌و پیاوه‌ خه‌ڵک وه‌ پێکه‌نین ده‌خه‌ن. خه‌ڵکانێکی تر له‌به‌رده‌رگای شاره‌داری خه‌ریکی وه‌رزشی تێنیس و چاولێکردنی فیناڵی ژنانی ئو وه‌رزشه‌ بوون

موزه‌کانیش پڕن له‌ خه‌ڵکم من ته‌نیا خۆم به‌ موزه‌ی پۆتی پاله‌ دا کرد و که‌مێک وێنه‌ و تابلۆ و ئاسه‌واری سه‌ده‌کانی ده‌ تا پازده‌ی زایینیم دیتن که‌ باسێک بوو له‌سه‌ر هوونه‌ری مه‌زهه‌بی و دینی،ئه‌و هه‌موو پوڵ و سروه‌ت و زێڕه‌ی ئه‌وکات خه‌ر جی جل و به‌رگی که‌شه‌کان و په‌رده‌ی کلیساکان و شه‌مدانه‌ زێڕه‌کان کراوه‌ و خه‌ڵکیش له‌ برسان ده‌مردن،هه‌ر وه‌ک ئێستا مه‌لاکان ی مزگه‌وتکان و واتیکان و که‌شه‌کان و هه‌موو ئه‌وانه‌ی باسی دین ده‌که‌ن و پوڵ بۆ خه‌ڵکی هه‌ژار کۆده‌که‌نه‌وه‌ و بۆخۆشیان جل و به‌رگ و ماشێن و ماڵی سازکراو له‌ زێریان

جاران بۆ هه‌ر شه‌مێک له‌ کلیساکان دامده‌گیرساند یه‌ک یۆرۆ یان دوانم له‌ سندوق ده‌هاویشت ئێستا ته‌نیا سی سانتیم چوونکه‌ ده زانم هه‌ر به‌وه‌نده‌یه‌ و خودا پێی خۆش نیه‌ کچێکی وه‌ک من هه‌ژار و تازه‌ ده‌ست به‌ گیرفان گه‌یشتوو دوو ئۆرۆ بۆ شه‌مێکی بچووک بدا و بگری.

the duchess

2008-11-30T20:03:00.003+01:00

باسی کچێک, سەردەی نۆزدەی ئینگلیستان دەکا کە بە بێ ئەوەی تامی ئەوین بزانێ دەبێتە ئامرازێک بۆ مێردەکەی کە کوڕێکی پێشکەش بکا بۆ ئەوەی رەگەز کوێر نەبێ پیاوێک کە تەماح لە هەموو کچ و ژنێک دەکا بە هەموو شیوەیەک خەیانەت بە ژنەکەی بکا و تەنانەت دوو سەگەکەی لە ژنەکەی خۆشتر دەوێ. جۆرجینا نموونەی ژنانی کۆمەڵگاکانی رۆژهەڵات و ئێران و کوردستانە،هەرچەند ئیستاکە کەمێک لە جاران باشترە.

پوڵ

2008-11-30T19:39:00.001+01:00

هەتا زیاتر بە شوێن داواکاری و ئاواتەکانتدا دەکەوی و هەوڵیان بۆ دەدەی،زیاتر هەست بە ناهومێدی دەکەی. بارودۆخی ئابوری جیهان خراپتر بووە و لەوەش خراپتر دەبێ. هەژاری و فەقیری تەنیا لە شەقامەکانی شارو دێهاتەکانی ئێران نابینی، لێرە لە فەرانسە، لە نێو ناخی پاریسیش دا مەرگی سواڵکەرەکانی دارستانی وەنسێن و هاواری ژنانی منداڵەوەبەری سەر عەرزە تەڕەکانی مێترۆ دڵت پڕ دەکا و رێگای نەفەس کێشانت لێ دەستێنێ. هەژاری زۆر ترسناکە.ئەرێ قەت بووە بێ پووڵ بی ؟قەت بووە شتێکت پێویست بێ بەڵام نەتوانی بیکڕی؟
پووڵ چی لەو جیهانە کردووە. زۆر سەیرە هەموومان گیرۆدەی پوڵین. ئەگەر پوڵت بێ هەموو شتێکت هەیە هەرچەند هیچیشت نەبێ.ئەگەر هەژاریش بی، هیچت نیە هەرچەند هەموو شتێکیش لە خۆتدا شک بەری. باسی فەلسەفەم بۆ مەکەن و مەڵێن مرۆڤ نابێ پوڵپەرەست بێ و جیهان جگە لە پوڵ شتی گرینگتری کەش وەک برادەری و خۆسەویستی و مرۆڤایەتی و گەورەیی دڵ و لیخۆشبوون و مێهریشی تێدایە. ئەگەر نەخۆش بی،ئەگەر بێ پوڵ بی، ئەگەر جل و بەرگی جوانت نەبێ، ئەگەر نەتوانی پوڵی دەرس و کرێ ماڵ و هات و چۆت بدەی یان نەتوانی بە باشی بخۆی ئەوە کەس بە بنیادەمت حیساب ناکا. لە سەردەمی ئێمەدا دەبێ پووڵت بێ بۆ ئەوەی بە مرۆڤت حیساب بکەن. لە هەموو جێگایەک، تەبلیغ, هات و هاوار بۆ کڕین و پوڵ خەرج کردن دەکەن . وەرن بکڕن, پوڵەکانتان بینن شتمان لێ بکڕن، لە سندوقی نامەی ماڵێتەوە بگرە هەتا تلوزێن و رادیۆ و ئی مەیل و ئینتێرنێت و شەقام و ئۆتوبوس و تەنانت لە توالێت و دەست بە ئاویش دەستت لێ هەڵناگرن و بانگت دەکەن بکڕی .کە چاو لێ دەکەی دەبینی ئەوەی دەری دێنی بەشی خەرجی ئاسایی مانگانەت دەکا،کابرای بانک و بیمە و ئابونمانی تەلەیفون و هەموو کەس هەتا نێوت دەنووسن و دەتکەن بە کڕیاری خۆیان هەزار جار بە قوربانت دەبن، کە دەتهەوێ نیوت پاک کەیەوە و ئابونمانەکەت بگۆڕی بە هەموو شێوازێکی بێ ئەدەبانە و توڕانە لەگەڵت هەڵسووکەوت دەکەن.
ژیان ئاوایە.... پوڵ،پوڵ،پوڵ.

4 بزە

2008-08-19T18:45:00.002+02:00

لەمێژە لە نێو مێترۆ یان لە گەڕەکە قەرەباڵغەکانی پاریس لە دو ناگەڕێم؛ ئەو ماوەیە بە هۆی نەخۆشیەوە شتێک فێر بووم ئەویش ناسینی دوکتوری چەتەیە.سەیر نیە؛ هەر یەکەی نرخی ویزیتی خۆی جوودایە. جاری وایە دوکتورێک کە نۆرەی 3 مانگ بە نەخۆش دەدا بە تەلەیفونێک دەڵێ سبەی وەرە بەڵام نرخی تایبەتم هەیە. کە دەچی بۆلای 4 جار گرانتر لە نرخی کۆنوانسیۆنت لێ دەستێنێ و لەسەر کاغەکە نرخی باوت بۆ دەنووسێ ئەوە دزی نیە؟ ئەگەر نەخۆشی و حاڵت خراپە مەجبوری بۆ تەندروستیت قەبووڵی بکەی.

رۆژیک دوای کار لە مەک دۆناڵد دانیشتبووم نانێک بخۆم.ئەوێ لە جێگاکانی دیکە هەرزانترە دەنا ئاشقی چاوی نیم.خولاسە؛ سەرت نەهێشنێم دانیشتبووم ژنێکی سواڵکەر لەوانەی هەمیشە زگم پێیان دەسووتێ و هیچیان نادەمێ بەشکم هەوڵ بۆ ژیانیان بدەن و لەو باند بازیە بێنە دەر هات و داوای پووڵی لێ کردم منیشم هیچم نەدایە.کەمێک ئەولاتر چووە لای دوو مێرمنداڵی 13 یان 14 سال و ئەوانیش چاوێکیان لێ کرد و قسەکەیان وە پێکەنینی خستم.دادە گیان دایکمان 20 ئۆرۆی داوینێ. 15 مان لێرە خەرج کردوە و 5 یشی بۆ بلیتی مێترۆ بۆ گەڕانەوەمان. ژنەکە بە باشی لێیان تێ گەیشت و دوور کەوتەوە. روون کردنەوە لەوە جوانتر؟

کەوشەکانم دوو خەتی هەیە بە دوگمە وەسڵ دەبوو یەکیان لێ ببۆوە ؛ کاتم نەبوو بچم چاکی کەم لەگەل لاقم بۆ هەموو جێگایەکی پاریسم

رادەکێشا.رۆژێکیان لە نێو مێترۆ بە پەلە دەچووم بۆ سەر کار. پیاوێک لە سواڵکەرە مەستە تایبەتیەکانی ئێرە نازانم چۆنی دیتبوو؛پێشی پێ گرتم و کزتی بە مقەست بۆت لێ دەکەمەوە بۆ ئەوەی جوانتر برۆی بەڵام 2 ئۆرۆت لێ دەستێنم. لە پێشدا ترسام و روویەکی وام نەدایە دوایە دیتم بە راستی مقەستی پێیە و قەتاری منیش 4 دەقەیەک دوایە دەهات. دانیشتم و بە مقەست بە جوانی دوو لقەکەی بۆ لە کەوسەکەم لێ کردەوە و منیش 2 ئۆرۆکەم دایە.ئەوەندەی ئەو خۆشعاڵ بوو دوو ئەوەندە من.

لەگەڵ بنەماڵەیەکی سانتی مانتاڵی دەولەمەندتر لە خۆمان ؛ من و خۆشەویستەکەم چووینە سەفەری نیس و مۆناکۆ بۆ 2 رۆژی کۆتایی حەوتوو. هەر ئێمە ویستمان بچینە سەیری موزە و کۆشکی کۆن و کەناری دەریای ساکار و خۆڵاوی و ئەوان ویستیان بچنە سەیری دوکان و بازاری گرانفرۆش و لوکس و سەردانی کۆشک و ویلای دەولەمەندەکانی جیهان.لە کۆتاییدا ئێمە شکەستمان خوارد و کە هاتینەوە ماندوو بووین و هیچمان پێ نەبڕا و بەڵێنیمان دا جارێکی دیکە بگەڕێینەوە ز ئەوجارەیان بە تەنیا دوو بە دوو بچینەوە و بە دڵی خۆمان بکەین.

2008-07-21T17:54:00.000+02:00

مرۆڤە بە هۆش و مێشکەکان بە کەمی لەو جیهانەدا لە جێگای شیاوی خۆیانن؛ئەوانەی لە جێگای زۆر باشن؛بە بیر و مێشكێکی ئاساییەوە گەیشتوونەتێ . یان زۆر پڕکارتر بوون یان زۆر بە شانستر یانیش وەک زۆربەی جاران کۆمەڵگەی ئەورۆکە مرۆڤی زۆر بە مێشکی ناوێ ئەوانی لە جێگایان داناوە.

لێرە و لەوێ

2008-06-16T11:55:00.001+02:00

دونیا وای لێ هاتووە؛ ئەوەی نابێ ببێ دەبێ،ئەوەی دەبێ ببێ نابێ.داهێنان ‌شتێکە زۆر بە کەمی لە نێو ئێمەی کورد دا گەشەی کردووە.لە پلەی لاساکردنەوەد(کە ئەویش بۆ گەشە کردن و هەڵچوون پێویستە) دەمێنینەوە و قەت فێری داهێنان نابین.
بەرنامەی تێلێوزیۆنی فەرانسە چاو لێ دەکەم،هیچیان لەوی دیکە ناچن. ئەوڕۆ چاوم لە بەرنامەی(ئاوێنەی حەفتەی تیشک تی ڤی) کرد. ستایل هەر ستایلی رووداوە،تەنیا لە جێگای رۆژنامەکانی ئوروپا و ئامریکا،ئەوانی کوردستانە.ماشاڵا
.......................................
دەڵین ئەرێ چی دەکەی خەریکی چی،دەڵیم دیسان خەریکی کۆ کردنەوە و خۆ قەڵەو کردنم بۆ ئەوەی بیکەم بە نامیلکەیەک و بە مفت دەرخواردی ئەوانەی دەم وا قەدری نازانن.گاڵتە بوو ئەوجارەیان دەنکە جۆیەکیشم لە مست دەر ناهێنن،قڕ و قەپە
.........................................
خەریکە باسی زەماوەندم لەگەڵ دەکا، منیش دەترسم، دەترسم پیاوێکی ناسکتر لە گوڵ و گوڵای شارەکەی،دوای زەماوەند کردن وەک کوڕانی مێدیا ببێتە دڕوو و بریندارم کا. هەر ئاوا باشە،هەست بە خۆشویستنی و خۆشویستنم دەکەم و دەکەین

.......................................
ئەرێ کەس لێرە دەروون ناس هەیە؟ قسەیان ،قیافەیان بە پەناباتێک ناوێ ئەوەندە بێ تام و لاساکەرانەیە،تێ ناگا و بۆتە بەرپرسی پرۆپاگاندا کردن بۆ خۆی. یەکی تر بە زۆر ناتوانێ لەسەر هیچ بابەتێک بنووسێ و دێڕی

دەفتەرەکەی ڕەش کاتەوە،دەرگا و کلیلی بۆ دەفتەرەکەی داناوە

...............................

باوەڕم بــــــــــــــــــە چوارچێوە نەماوە. لە دەرەوەی سنوورەکانی مێدیا, لە کاشان بۆ شوالیەی خەونەکانم گەڕام،ئێستا لەگەڵیم،رەنگی چاوی تیلەییە، هەر جارەی رەنگێک دەنوێنن، پێم وایە ئەوەیە وا لێی دەگەڕام.

نه‌ورۆز کاتی تازه‌ بوونه‌وه‌

2008-03-25T11:28:00.003+01:00

نه‌ورۆزه‌، پیرۆز بێ،ئه‌رێ نه‌ورۆز هی کێێه‌؟کورده‌کان ده‌ڵێن هی ئێمه‌یه‌، فارسه‌کان، به‌ هی خۆیانی ده‌زانن، تاجیک و ئه‌فغان و تورکمه‌نستانیه‌کانیش نه‌ورۆز ده‌گرن، که‌مێک ئه‌ولاتر، له‌ تایله‌ند و چین و تایوانیش، مانگێک پێش ئێمه‌ ، له‌ کاتی هاتنی به‌هاریاندا، ساڵ نوێ ده‌که‌نه‌وه‌.نه‌ورۆز ماڵی هیچ که‌س نیه‌ به‌ڵام بۆ هه‌موو که‌سه‌، هه‌ر وه‌ک کریسمه‌س که‌ ساڵی نوێی زۆر که‌سه‌ و مڵکی هیچ که‌س نیه‌. هه‌مووی ئه‌وانه‌ بۆ ئه‌وه‌یه‌ مرۆڤه‌کان یه‌ک جار ، لانی که‌م یه‌ک جار له‌ ساڵدا نوێ ببنه‌وه‌ و تازه‌گی و نوێیی به‌ ژیان و مێشک و دڵ و روخسار و ماڵ و حاڵیان بده‌ن، چوونکه‌ بێ ئال و گۆڕ و نۆ بوونه‌وه‌ ژیانی بێ مانایه‌،ته‌حه‌مولی چرکه‌کانیش ئه‌سته‌مه‌،جا ئه‌وه‌ منیش هه‌وڵم داوه‌ که‌مێک ئاڵ و گۆڕ ساز بکه‌م، ئه‌و مانگه‌ یان مانگه‌که‌ی دیکه‌،به‌ زوویی، ئه‌گه‌ر ئێستا له‌ ئاڵ و گۆڕ بترسم وه‌ک ئه‌و هه‌موو چرکانه‌ ی ساڵی ڕابردوو ترساوم، ناتوانم ژیانم بۆ خۆم خۆش که‌م، ناتوانم هه‌ڵبچم و گه‌شه‌ بکه‌م، که‌ وایه‌ ناترسم و جارێکی تریش، هه‌وڵی گۆڕینی هه‌موو شتێک له‌ ژیانم ده‌ده‌م، ئه‌وجاره‌یان به‌ ته‌نیا نیم و هاوڕێگایه‌کم له‌گه‌ڵه‌ که‌ یارمه‌تیم ده‌دا.

نه‌ورۆز پیرۆز، ئاڵ و گۆڕ و نوێ بوونه‌وه‌تان پیرۆز، هیوادارم ئه‌وساڵتان وه‌ک هیچ یه‌ک له‌ ساڵانی ڕابردوو نه‌چێ و جیاواز بێ

photo: internet-azarbayjan and torkmanestan novruz

کارخانه‌ی مێشک

2008-03-05T14:47:00.003+01:00

ڕؤژێک دانیشتم، هه‌موو ئه‌و که‌ل و په‌لانه‌، ئه‌و بابه‌تانه‌، ئه‌و شتانه‌ی له‌ نێو مێشکمدا خه‌ریکی هات و چۆ و ورد بوون و نه‌رم بوون و هاڕاندنن، لێک داوه‌ و به‌سه‌ریان دا چوومه‌وه‌،ماوه‌یه‌که‌ له‌ پوڵ، کرێ ماڵ،داهات و مووچه‌ی مانگانه‌م زیاتر چی تری تێدا نیه‌، له‌ ترسی ئه‌وه‌ی سه‌ری مانگ نه‌توانم کرێ ماڵی تێرێز بده‌م یان حیسابه‌که‌م نه‌چێته‌ ژێر سیفر، شه‌وانه‌ زۆر نانووم، زۆر کتێب ناخوێنه‌مه‌وه‌ و کتێبه‌که‌م له‌ لاپه‌ڕه‌ی 214 ماوه‌ته‌وه‌ و زۆری نه‌کردوه‌.

جاران که‌مێک بیرم له‌ خۆم ده‌کرده‌وه‌ بزانم چیم، بۆ کوێ ده‌ڕۆم، چۆن ده‌ژیم و ده‌بێ چۆن بژیم، بیرم له‌ ده‌ورووبه‌رم ده‌کردوه‌، له‌ کورده‌کان، ته‌نانه‌ت فریای ئافریقا و ئاسیا و مرۆڤه‌کانی داهاتووش ده‌که‌وتم و خه‌ونم بۆ ده‌دیتن به‌ڵام ئیستا، ژیانی سه‌رده‌می ماشین و پاره‌، وای لێ کردووم، کارخانه‌ی مێشکمی وا داگیر کردوه‌ که‌ چی تر به‌رهه‌می ره‌نگینی ویستی دڵم لێی نایاته‌ ده‌ر، له‌ ماڵ ده‌گه‌ڕێم، له‌ حیسابی بانکێکه‌م ده‌کۆڵمه‌وه‌، چی تر وه‌ک جاران له‌ بیری باشترکردنی کاره‌که‌م دانیم، هه‌موو شتێک به‌ دوو کاغه‌ز و ئاسنی پوڵه‌وه‌ به‌ستراوه‌ته‌وه‌، له‌وه‌تا فیلمی نه‌وه‌د و نۆ فرانکیشم بینیوه‌ ئه‌وه‌نده‌ی دیکه‌ خه‌ریکم له‌ جیهانی ماشێن و پول بێزار ده‌بم.

2008-02-13T10:57:00.002+01:00

لێره‌

کاتێک کورده‌کان و حکوومه‌تی کوردی خۆیان ئازادی به‌یان و ڕۆژنامه‌ڤانی پێشێل ده‌که‌ن، چاوه‌ڕوانی چی له‌ حکوومه‌ته‌کانی دیکه‌ ده‌که‌ی؟

2008-01-31T16:53:00.000+01:00

جاری وایه‌ له‌وه‌ی هیچ شتێک له‌ سه‌ر جێگای خۆی نیه‌ و هیچ که‌س له‌سه‌ر شوێنی خۆی، خه‌مناکم، به‌ڵام هیچ ده‌سه‌ڵاتێکم نیه‌ و بیر له‌وه‌ ده‌که‌مه‌وه‌ که‌ ئه‌گه‌ر هه‌موو شتێک له‌ سه‌ر شوێنی خۆی بایه‌ و هه‌موو که‌سێک به‌ پیی توانایی و لێهاتوویی و گه‌وره‌یی دڵی ژیان و هه‌ل و مه‌رجی بۆ ڕه‌خسابا، ئیتر تێکۆشانی بێ وچان بێ مانا ده‌بوو، ئێمه‌ بۆچی و بۆ پێکهێنانی چی و بۆ به‌ربه‌ره‌کانی له‌گه‌ڵ چی هه‌وڵمان بۆ ژیان دابا؟

ئه‌گه‌ر توانیت و بۆت کرا، به‌شی خۆت هه‌وڵ بده‌ ئه‌و شتانه‌ و ئه‌و که‌سانه‌ بخه‌یه‌ سه‌ر شوێن و جێگای خۆیان ، ئه‌گه‌ر جێگا و شوێنه‌که‌یان ده‌زانی،ئه‌گه‌ریش نا ئه‌وه‌ لێی گه‌ڕێ و خۆت له‌و شت و که‌سانه‌ لاده‌ که‌ له‌ سه‌ر شوێن و جێگای خۆیان نین.

2008-01-05T10:53:00.000+01:00

هه‌موو بوونه‌وه‌رێکی زیندوو که‌ نه‌فه‌س ده‌کێشێ، چ به‌ ئۆکسیژێن ، چ به‌ دی ئۆکسیدی که‌ربۆن، فه‌رق ناکا کامیان، ڕۆژێک دادێ، پیر ده‌بێ، نه‌خۆش ده‌ه‌که‌وێ، هه‌ست ده‌کا به‌شێک که‌ له‌شی یان هه‌موو له‌شی وه‌ک جاران کار ناکا و ئێنێرژیه‌کی وای بۆ درێژه‌دانی ڕێگاکه‌ نه‌ماوه‌.ئه‌وڕۆژانه‌ی نه‌خۆشی،یان هه‌ست به‌ بێ هه‌ستی له‌شت ده‌که‌ی،ڕه‌نگه‌ هه‌م بترسی و هه‌میش بێ سرنجدان به‌ ده‌وروبه‌رت بکه‌وێ نێو دونیایه‌کی جیاوازه‌وه‌، دونیایه‌ک که‌ تێیدا خه‌می ئه‌وه‌ت نه‌مێنێ جوانی یان نا، لاوی یان پیرتر دیاری،خه‌می ئه‌وه‌ت نه‌بێ چی بخۆی یان بۆ شام چی لێ نێی یان له‌ فڵان میوانیدا چی له‌به‌ر بکه‌ی، به‌ڵکوو زیاتر خه‌می نه‌فه‌سه‌کانت بێ که‌ به‌ فێڕوو نه‌ڕۆن و نه‌یه‌ن

ئه‌گه‌ر نه‌خۆش ده‌که‌وی یان له‌ بواری جیسمیه‌وه‌ لاواز ده‌بی و ڕووداوێک ناهێڵێ مێکانیزمی جیسمت وه‌ک جاران کار بکا، تێ ده‌گه‌ی بۆ ده‌بێ بژی و نه‌فه‌س بکێشی، حاڵی هه‌ی چرکه‌کانی ژیان چه‌نده‌ گرینگن و چه‌ند ئه‌وه‌نده‌ش کورتن،ئه‌وکات هه‌ست به‌ جودابوونه‌وه‌ له‌ ژیانی زه‌وی و فڕین بۆ جیهانی ده‌روونت ده‌که‌ی. جیهانێک که‌ که‌س ئاگای له‌ ئازاره‌کانی نیه‌، تۆ ده‌ڵێی هێشت هه‌یه‌، تۆ ده‌ڵێی لاوازی، تۆ ده‌ڵێی بێ هه‌ستی و که‌س لێت تێ ناگا و هه‌ستت پێ ناکا چوونکه‌ لاوازی و بێ هه‌ستی تۆ نابیندرێ. ته‌نیا بزه‌یه‌ک، یان جووڵانه‌وه‌ی سه‌رێکه‌ و هیچی تر بۆ ئه‌وه‌ی بزانی لێت تێ گه‌یشتوون

قه‌ت بووه‌ بچیه‌ نێو کۆماوه‌ و بێهۆش بی؟ که‌ ده‌چیه‌ نێو کۆما یان بێهۆش ده‌بی، له‌ ژیانی زه‌وی و مرۆڤه‌کانی و نه‌فه‌سه‌کانی داده‌بڕی و له‌ نێو بوون و نه‌بووندا، له‌ نێوان مان و نه‌ماندا چنگ لێ ده‌ده‌ی و نازانی چنگ له‌ چی ده‌ده‌ی و بۆ، ته‌نیا ده‌زانی ده‌بێ هه‌وڵ بده‌ی و بژی، نه‌فه‌س نه‌کێشانت به‌ مانای ماڵئاوایی له‌ هه‌موو شتێکه‌ و نابێ ڕاگیرێ

بڵێی ئه‌وده‌م هه‌ست به‌ بوون بکه‌ی یان نرخی نه‌سه‌فه‌کانی ژیانیت باشتر بزانی؟ وابزانه‌ جارێکی تر ده‌رفه‌تی نه‌فه‌س کێشانت بۆ جاری دووهه‌م پێ دراوه‌، دوایین شانسی ژیانت تاقی که‌وه‌ و بژی

بۆ شلێر

ئه‌ده‌بیاتی پێکه‌نینی

2007-12-26T10:33:00.000+01:00

ئه‌وه‌ نموونه‌یه‌ک له‌ ئه‌ده‌بیاتی پێکه‌نینی، له‌ سایتی پوک مێدیادا چاوی لێ بکه‌ن

به‌مه‌به‌ستی هاندانی ده‌ستی كاری پسپۆڕی ناوخۆ له‌ بواره‌ جیاجیاكان و پاڵپشتیكردنی پڕۆژه‌ی نوێ و كاری نوێ، سه‌نته‌ری سه‌رده‌می جوانكاری له‌ شاری سلێمانی و له‌ بینای ده‌زگای سه‌رده‌م كرایه‌وه‌. پڕۆژه‌و سه‌نته‌رانه‌ بكرێته‌وه‌ بۆ مه‌به‌ستی ڕێنوێنی كردن و هاندانی پیاوان و ژنان بۆ جوانكاری و پاراستنی پێست و گه‌شه‌یان."عبدالقادر" به‌رپرسی سه‌نته‌ره‌كه‌ ئومێدی خواست به‌ هاوكاری هه‌موولایه‌ك خزمه‌تگوزاریی به‌پیاوان و ژنانی سلێمانی و هه‌رێمی كوردستان بگه‌یه‌نن.سه‌نته‌ری سه‌رده‌می جوانی له‌ سلێمانی بۆ جوانكردن و پاراستنی پێست، به‌ لێزه‌ر كاره‌كان ئه‌نجامده‌دات بۆ پیاوان و ژنان و پسپۆڕییان له‌و بواره‌دا هه‌یه‌ بۆ لابردنی چرچولۆچی پێست و باش ڕاگرتنی بۆ دروست كردنی نه‌وه‌یه‌كی ته‌ندروست و باش و شاره‌زا له‌ بواره‌كانی خۆڕێكخستندا

پاپ بێنێدیکت، ده‌بێته‌ بابا پێندیکت له‌ په‌یامنێر ڕێکه‌وتی 26ی دێسامبری 2007

ده‌رهێنه‌ره‌کانی باشوری کوردستان تیتری فارسی ده‌که‌نه‌ کوردی بۆ فیلمه‌که‌یانی داده‌نێن ، خه‌ڵاتیشی پێ ده‌به‌نه‌وه‌، ئیدی ناڵێن 12 میلیۆنێک کوردی ئه‌ودیو له‌ ئێران ئه‌و فیلمه‌یان به‌ تیتیری فارسیه‌وه‌ دیوه‌ و عه‌یبه‌.په‌ڕینه‌وه‌ له‌ غوبار، هه‌ر تیتری فیلمی عبور از غباری ئێرانه‌ کراوه‌ به‌ کوردی و ته‌ق لاساکراوه‌ته‌وه‌ و سه‌یر ئه‌وه‌یه‌ خه‌ڵاتیشی پێ ده‌به‌نه‌وه

بوش بۆ ده‌بێته‌ بۆش؟ ژاپۆن بۆ ده‌بێته‌ یابان؟ بروسکه‌ نامه‌ی پیرۆزبایی چیه‌؟ ئه‌رێ مجازه‌فه‌ کردن له‌ کاتی دووگیانیدا یانی چی؟له‌ سایتی هاووڵاتی ڕێکه‌وتی 21 ی دێسامبر نووسرابوو‌

یاخی به‌ ته‌وانی 2

2007-12-14T10:34:00.000+01:00

تۆ خه‌ونی ڕووت بوونه‌وه‌ی له‌شی منت ده‌بینی،من خه‌ونی ون بوونی تۆ ، داپۆشراو به‌ ته‌پ و مژێکی ڕه‌ش که‌ قه‌ت نه‌یتوانی و ناتوانێ ڕووتی ڕووحم ببینێ

من گڵۆڵه‌ی به‌نی سه‌رکه‌وتنه‌کانم به‌ خووری یارمه‌تی هیچ ئاده‌مێک هه‌ڵنه‌کرده‌وه‌

به‌ڵام تۆ خۆت به‌ ئازار و سه‌بوری حه‌واکانی دیاری کوێستانه‌کان گه‌وره‌ کرد و پشتت تێ کردن.

کێ ده‌ڵێ منیش حه‌وایه‌کی تری نێو خه‌ونه‌کانت نه‌بووم و هه‌موو وزه‌ی له‌شمت نه‌ویست بۆ هه‌ڵچوونت و دوایه‌ش به‌جێهێشتنم بۆ حه‌وایه‌کی دایه‌نی داهاتوو؟

یاخی

2007-12-14T10:04:00.000+01:00

.من ژنم،شیره‌ ژن نیم،که‌ڵه‌ ژن نیم،نانه‌ڕێنم وه‌ک شێر و جوانه‌گاکان که‌ نازانن بخوولقێنن و گیانیان لێ بێته‌وه‌

.که‌ ناتوانن ببن به‌ دوو ،ده‌سه‌ڵاتی ژیانی 279 ڕۆژه‌ی به‌هه‌شتی منیان نیه‌

.من ژنم، زمانم، ددانم، پێ هه‌ڵگرتنم،ته‌واو بوونم، هه‌موو نووره‌ و خێرا،بۆ جوبرانی که‌میه‌کانم،نانه‌ڕێنم،ناوه‌شێنم

.من ژنم ،خودی خودا،ئه‌ویش ژنه‌،ده‌خوولقێنێ و 279 ڕۆژ به‌هه‌شتی دوو گیانه‌

2007-12-12T11:07:00.000+01:00

ئه‌وجاره‌یان نه‌نووسینم لێره‌ به‌ دلخوازی خۆم بوو، نه‌ له‌به‌ر نه‌بوونی کات و له‌ به‌ر نه‌بوونی بابه‌ت بۆ باس کردن و نه‌ له‌به‌ر له‌ ده‌ستچوونی ئاوات و هیوایه‌ک بۆ ده‌ربڕین، ئه‌وجاره‌یان بیرم کرده‌وه‌ وه‌ک هه‌میشه‌، به‌ پێچه‌وانه‌ی داواکاری مایا، ژنه‌ ڕه‌شه‌که‌ی ساحێلی عاج که‌ وتی مه‌هێڵێ مێشکت زیاتر له‌و ڕاده‌یه‌ی له‌ توانای دایه‌ بیره‌کان له‌ خۆیدا بئاخنێ ، چوونکه‌ بیر کردنه‌وه‌ جاری وایه‌ له‌ کار کردنت دوور ده‌خاته‌وه‌،ئه‌وجاره‌یان زۆرم بیر کرده‌وه‌ له‌ نووسین و نه‌نووسینم لێره‌،من له‌به‌ر ئه‌وه‌ به‌ کوردی لێره‌ نانووسم که‌ زمانی کوردی بپارێزم یان له‌ ڕقی فارسێک که‌ به‌ زمانی زگماگی خۆی ده‌نووسێ منیش بڵێم با ئه‌گه‌ر ده‌نووسم با که‌مێک به‌ کوردی و کولتوری کورد و بلۆگی کوردی زیاد که‌م، به‌ڵکوو نووسینم زیاتر بۆ ئه‌وه‌ هه‌ڵبژاردووه‌ که‌ تۆمار که‌م، ئه‌وه‌ی هه‌ستی پێ ده‌که‌م و بیری لێ ده‌که‌مه‌وه‌، تۆمار بکه‌م .بیرکردنه‌وه‌یه‌ک که‌ ته‌نیا میراتی وڵاتی دایکمه‌ و خاڵی هاوبه‌شی من و کورده‌کانی تر که‌ به‌ بیر کردنه‌وه‌ی زۆر به‌ تایبه‌ت له‌ هه‌ نده‌ران مه‌حکوم بووین،من ئه‌گه‌ر ده‌نووسم ده‌بێ لێم تێ بگه‌ن، ئه‌وانه‌ی لێره‌ تێ ده‌گه‌ن و کۆدی پیته‌کان له‌ نێو مێشکیاندا مانا ده‌که‌نه‌وه‌ کوردن و به‌ کوردی ده‌نووسن و ده‌خوێنن، ئه‌و انه‌ی کوردن و کوردی خوێندنه‌وه‌ و نووسینی کوردی به‌ پیتی سۆرانی نازانن یان کوردن و نازانن بخوێننه‌وه‌ و یان کورد نین ، ناتوانن لێم تێ بگه‌ن.بۆ من گرینگه‌ لێم تێ بگه‌ن.ئه‌گه‌ر به‌ ئینگلیسی بنووسم، هه‌رچه‌ند شکم هه‌یه‌ هه‌موو وشه‌ و دێڕه‌کانم به‌ شێوه‌ی زمانی دایکم بتوانم به‌ زمانی دیکه‌ بگه‌یێنم، دیسان زۆر کورد و ناکورد هه‌ن نازانن و لێی تێ ناگه‌ن، به‌ فه‌رانسه‌وی هه‌رواتر، به‌ فارسیش نابێ، به‌ کوردیش ئه‌وه‌ دیسان وایه‌، من ده‌بێ چ زمانێک بۆ ئه‌وه‌ی هه‌موو لێم تێ بگه‌ن به‌ کاربهێنم؟ خۆ هوونه‌رمه‌ندیش نیم شکڵ و ڕه‌سم و دیمه‌ن و ده‌نگێک که‌ هه‌موو مرۆڤه‌کان تێ ده‌گه‌ن بزانم. ئایا نووسینی من به‌ کوردی و به‌ پیتی سۆرانی ئه‌وه‌نده‌ی کاناڵ و که‌لێنه‌م بۆ ناسینی کوردی کوردی زان لێ ده‌کاته‌وه‌، دوو ئه‌وه‌نده‌ نابێته‌ هۆی ئه‌وه‌ی ناکورده‌کان لێم تێ نه‌گه‌ن؟یان دیوارێک به‌سه‌ر پێوه‌ندیه‌کانم دا ناکێشێ؟چه‌ند خۆش ده‌بوو به‌ زمانێک که‌ هه‌موو لێم تێ گه‌یشتبان نووسیبام.حه‌یف

2007-11-22T08:52:00.000+01:00

به‌ڵێ فێر ده‌بین یان بێ فێر بوون, له‌ خوێن و ره‌گه‌زمان دایه‌، چۆن له‌ دایک ده‌بین به‌ بێ فێر بوون بگرین و بچریکێنین، هه‌ر ئاوا به‌ هاسانی و به‌ ڕوونی ئاوێکی زوڵالیش، ده‌زانین باز بده‌ین،چرکه‌کان تێپه‌ڕ که‌ین و له‌ ناخۆشترین ساته‌کانی ژیانمان ته‌نیا یادێکی بێ ڕه‌نگ و ڕوو بهێلێنه‌وه‌.له‌بیرمانه‌وه‌ی ئه‌و هه‌موو ئازار و ناخۆشی و به‌تاڵیه‌ی ژیانی ئه‌و به‌ ملیارد مرۆڤه‌ی سه‌ر زه‌وی ئیستا و به‌ ملیارد مرۆڤه‌کانی پێش ئێمه‌ و زه‌وی پێشوو و ئه‌وانه‌ی داهاتووش، له‌ نێو مێشکدا، سێلوله‌کان پیرتر ده‌کا و ئیزنی پێشکه‌وتن و هه‌نگاو هه‌ڵهێنانه‌وه‌ نادا به‌ڵام وا نیه‌،من و تۆ و‌ هه‌زاران مرۆڤی تر ده‌که‌وین و بریندار ده‌بین و سه‌رمان ده‌شکێ و دڵمان له‌ت له‌ت ده‌بێ و ماشێنی کوک کراوی نه‌فه‌سه‌کانمان جاری وایه‌ ماندوویه‌ و ڕاوه‌ستاوه‌، هه‌ڵده‌ستینه‌وه‌. راست ده‌بینه‌وه‌ و له‌بیر ده‌بینه‌وه‌ و به‌ره‌و پێشێ ده‌ڕۆین. له‌ پیش ئێمه‌دا چی هه‌یه‌ که‌ ئاوا هه‌موو بۆی ده‌چین و بۆی فیدا ده‌که‌ین و بۆی هه‌وڵی بێ وچان ده‌ده‌ین؟دیپلۆمێکی باش؟سروه‌ت و ده‌وڵه‌مه‌ندێ؟نیوبانگ و مه‌شهوربوون؟مێردێکی یان ژنێکی باش و منداڵی جوان و به‌ مێشک که‌ بتوانی ئاوڕی لێ ده‌یه‌وه‌ و بڵێی هی منه‌؟فێر بوون؟فیر بوونی چێ؟بۆچی؟له‌زه‌ت و خۆشی؟بۆچی ؟ هه‌تا که‌ی؟

به‌ڵێ،ئێمه‌ ده‌ڕۆین وده‌ڕۆین ونازانین به‌ره‌و کوێ و پێمان وایه‌ ده‌زانین و زانیومانه‌.جاری وایه‌ بۆ تێپه‌ڕ کردنی ڕێگایه‌ک که‌ نازانین به‌ره‌و کوێمان ده‌با،دڵ ده‌شکێنین، سه‌ر دێشێنین،ئازار ده‌ده‌ین و جێگای برینه‌کان ساڕێژ ناکه‌ینه‌وه‌،هه‌ر بۆ ئه‌وه‌ی بڕۆین.گرینگ ئه‌وه‌یه‌ بڕۆین و هیچی تر.بڕۆین بۆ چی؟بژین بۆچێ؟

ئێمه‌ چاره‌یه‌کمان جگه‌ له‌ ژیان و ژین کردن نیه‌.ده‌توانی له‌ نیوه‌ی ڕێگا نه‌فه‌ست ڕاگری و مالئاوایی لێره‌ و له‌و ڕێگایه‌ بکه‌ی به‌ڵام که‌چی؟بۆچی؟تۆ هیچ ڕێگایه‌کی سێهه‌مت نیه‌ بۆ هه‌لبژاردن.نه‌ ده‌توانی‌ بگه‌ڕێیه‌وه‌ ، نه‌ زوویی و خێرایی ماشێنی ژیانت زۆر که‌ی. تۆ ته‌نیا بۆت هه‌یه‌ له‌و سه‌ده‌یه‌ و له‌و شوێنه‌ بژی و ڕێگاکه‌ که‌ وه‌ک هه‌میشه‌ نازانی بۆ کوێت ده‌با و بۆ ده‌بێ بڕۆی تێپه‌ڕ که‌ی.

من هه‌م چوونکه‌ بیر ده‌که‌مه‌وه‌، چوونکه‌ نه‌فه‌س ده‌کێشم؟ئه‌وه‌ یانی بوون؟هه‌موو فێعلێک یانی بوون ئه‌گه‌ر وایه‌.ده‌ڵێن له‌ محه‌به‌ت و ئه‌وین و دڵۆڤانیدا ده‌توانی مانایه‌کی جوانتر به‌و ڕێگایه‌ بده‌ی. به‌ڵێ ، ده‌توانی،ئه‌وه‌یان ده‌توانی،تۆ و من ده‌توانین ڕێگاکه‌ وه‌ک داری کریسمه‌س به‌ چه‌ند گوڵدانێک مێهر و به‌ چه‌ند دانه‌ گوڵی ئه‌وین و لامپی دڵۆڤانی بڕازێنینه‌وه‌ بۆ ئه‌وه‌ی دووپات بوونه‌وه‌ و ناتوانیمان له‌ هه‌ڵبژاردن و ژین کردن و ڕێگا پێوان وڕۆیشتن، فه‌رامۆش که‌ین.

2007-11-08T11:50:00.000+01:00

بڕۆن شک بکه‌ن ، بڕۆن به‌سه‌ر قه‌ڵای بیره‌کاندا بچنه‌وه‌، بیره‌کان ئه‌وه‌ نین بۆیان گووتووین، بۆمان ده‌ڵێن، ئاگاداریه‌کان ئه‌وه‌ نین به‌سه‌رماندا ده‌بارێن،له‌ چوارگۆشه‌ی جیهانه‌وه‌، ئه‌گه‌ر جیهان چوارگۆشه‌ بێ، ده‌بێ دایکی جیهان دووباره‌ ئێمه‌ بزێته‌وه‌،ئه‌گه‌ر دووباره‌ بینه‌وه‌،له‌ دایک بینه‌وه‌،ده‌بێ به‌سه‌ر هه‌موو بوونێکدا، هه‌موو ده‌بێیه‌ک دا بچینه‌وه‌.ئه‌وجاره‌یان کورد له‌ دایک مه‌بنه‌وه‌، به‌ کوردی مه‌ژین و به‌ کوردی مه‌مرن،ئه‌وجاره‌یان، خۆتان بن، بزانن خۆتان کوردن؟ئه‌و کورده‌ی له‌ نیو لاپه‌ڕه‌ی بێ لاپه‌ڕه‌ییدا بۆیان دۆزینه‌وه‌ و مانایان بۆ کردینه‌وه‌ و له‌سه‌ر نێوچاوانماندا هه‌ڵیان کۆڵی، ده‌بێ پاک که‌ینه‌وه‌، یه‌که‌م جار خۆمان بین،به‌ چاوی خۆمان به‌ لوتی خۆمان، به‌ سێلولی مێشکی خۆمان ، به‌ هه‌ستی خۆمان، جیهان ببینن، کورد بین یان نه‌بین، هه‌مووی ئه‌وانه‌ له‌ ده‌ربیجه‌ی ماڵی وجودی خۆمانه‌وه‌ بژین.

دایکم ده‌یگووت ده‌بێ هه‌رکه‌س له‌گه‌ڵ هاوته‌مه‌نی خۆی بێ،نه‌یده‌هێشت گوێگری قسه‌ی ژنانی هاوته‌مه‌نی بم، ده‌ترسا یان نا نازانم، به‌ڵام ده‌یویست منداڵیم بژیم و گه‌وره‌ییم له‌ ده‌ربیجه‌ی خۆمه‌وه‌ نه‌فه‌س بکێشم، ئێستا ده‌زانم ته‌مه‌ن گرینگه‌، ئه‌وانه‌ی له‌ من به‌ ته‌مه‌نترن ته‌نیا کاتێک به‌خێرهاتنیان پێ ده‌ڵێم که بۆ دیتنی جیهان، ده‌ربیجه‌ی دیتنیانم به‌سه‌ردا نه‌سه‌پێنن.‌

هه‌ر که‌س له‌ من نه‌چێ نه‌خۆشه‌

2007-10-10T16:08:00.000+02:00

له‌ ئێران ئه‌و پۆستێره‌ له‌سه‌ر دیواره‌ که‌ ده‌ڵێ هه‌رکه‌س له‌و دوو ژنه‌ی لای راست نه‌چێ و خۆی دانه‌پۆشێ و وه‌ک ئه‌و دوو ژنه‌ی لایه‌ چه‌پ بێ و مه‌کیاژ بکا و جلی کورت له‌به‌ر بکا ئه‌وه‌ نه‌خۆشی ده‌روونیه‌ و ده‌بێ بچێ بۆ دوکتور.ماوه‌یه‌کی دیکه‌ ئه‌و شیوازه‌ له‌ ته‌بلیغات،بۆ شووشتنه‌وه‌ی مێشکی کوڕان و کچانی خه‌تی خومه‌ینی په‌ره‌ ده‌ستێنێ و له‌وانه‌یه‌ کار به‌ جێگایه‌ک بگا که‌ کوڕان و کچانی جیاوازخواز بگرن و بیانبه‌ن بۆ نه‌خۆشخانه‌ی ده‌روونی.

نیشانه‌کان

2007-09-20T15:21:00.000+02:00

فڕینی باڵنده‌یه‌ک، زه‌رد هه‌ڵگه‌ڕانی گه‌ڵای دارێک، توندتر بوونی وزه‌ی بایه‌ک، گلێنه‌ی چاوی مرۆڤێک، وته‌ی پیاو و ژنێکی سه‌ر شه‌قام که‌ به‌ په‌له‌ به‌ په‌نات دا دێن و جاری وایه‌ ده‌بنه‌ بابه‌تی شه‌مۆله‌ی شه‌وانی شه‌ممه‌ی ...، منداڵێکی نێو کالسکه‌ که‌ چاوی له‌ ده‌ستت بڕیوه‌، زمانی سه‌گێکی چکۆله‌ و ڕه‌ش که‌ که‌وشه‌که‌ت ده‌لێسێته‌وه‌ و پێی وایه‌ خاوه‌نه‌که‌یی.

له‌ سه‌رێ، ئاسمان کایه‌ له‌گه‌ڵ چاوه‌کانمان ده‌کا، هه‌ورین و بێ هه‌ور، ڵێڵ یان ڕوون، شین یان بۆر، ته‌ڕ ته‌ڕ به‌ ئاوی باران یان سپی سپی به‌ ڕه‌نگی به‌فر، شێتی ئاڵ و گۆڕمان ده‌کا. په‌یامه‌کان کورت یان درێژ، به‌ ئه‌سپایی نه‌سیمی به‌یانان، به‌ شینایی ئاسمانی ڕۆژێکی هاوینی، یان به‌ په‌له‌ په‌لی مرۆڤێکی نێو داڵانی مێترۆ، دێن و ده‌چن، ماشێنی نێو مێشکمان کۆده‌کان، نیشانه‌کان وه‌رده‌گرێ و وه‌رناگرێ، بیریان لێ ده‌کاته‌وه‌ کاتێک کاتی بێ و سه‌رقاڵی که‌م، بیریان لێ ناکاته‌وه‌ زۆربه‌ی کاته‌کان.

ئه‌ی دڵ؟ دڵ ئه‌گه‌ر ده‌رکه‌کانی ئاواڵه‌ بێ، په‌یامه‌کان ده‌ناسێ، دڵه‌ ترسه‌نۆکه‌کان، به‌هه‌موو ترسه‌نۆکیانه‌وه‌، نیشانه‌کان جارو بار وه‌رده‌گرن و له‌ جیهان تێ ده‌گه‌ن.جیقنه‌ی کۆتێرک که‌ به‌رده‌بێته‌وه‌ سه‌ر ماشێنه‌که‌ت و حاڵی به‌یانیتی پێ تێک ده‌دا به‌ دڵێکی ئاواڵه‌ وه‌رگره‌، تووڕه‌یی پیرێ ژنێکی سه‌فی ئیداره‌ی پۆست که‌ جنێوت پێ ده‌دا و پێی وایه‌ شانت لێ دا و گوێی له‌ داوای لێ بووردنت نه‌بووه‌، به‌ نیشانه‌یه‌کی باش دابنێ، که‌ ڕۆژی یه‌کشه‌ممه‌ به‌ په‌نای کلیسایه‌ک دا تێپه‌ڕ بووی و پیاوێکی ره‌ش پێست بێ ئه‌وه‌ی بتناسێ تووشت بوو و پێی وتی خوا خۆشی ده‌وێی، په‌یامێکی تێدا به‌دی بکه‌.

دۆینێ له‌قه‌راخ ئاوی ڕووباری سێن، پیاوێک مرد، له‌ ڕۆژنامه‌که‌دا نووسرابوو،وێنه‌که‌شیم دیتبوو، پێشتر به‌وێدا ڕۆیشتبووم، به‌رامبه‌ر به‌ فۆنتێن له‌ ژێر پرده‌که‌، دیتبووم، چاوی تێ بڕیبووم، بیست سانتیمم دایه‌، زیاتر نا، ئێستا دڵم گیراوه‌.

موزیکڤانانی مێترۆی پاریس

2007-09-10T15:16:00.000+02:00

هه‌موو به‌یانیه‌ک له‌ وێستگه‌کانی میترۆ ده‌یانبینم ،ئه‌و موزیکڤانانه‌ی به‌ شمشاڵ و گیتار و ده‌نگی به‌ تینیان خووله‌که‌کان و ساته‌کانی نێو تونێلێکی ڕه‌ش و بێ ده‌نگ، گه‌رم ڕاده‌گرن و جوانیان ده‌که‌ن.

من نازانم ئه‌وان بۆ تونێله‌کانی مێترۆ و قه‌ره‌باڵغی شه‌قامه‌ بچووکه‌کان و هات و چۆی خه‌ڵکی به‌ په‌له‌یان بۆ ژه‌نین و نیشان دانی هوونه‌ریان هه‌لبژاردوه‌..... مرۆڤه‌کان لێره‌ زۆر به‌ خێرایی پاڵ به‌ یه‌که‌وه‌ ده‌نێن و به‌ بێ ئه‌وه‌ی سرنج بده‌نه‌ مێلۆدی موزیکێک که‌ له‌ ده‌ست و ده‌م و ناخی پیاو و ژنێکی ماندوو و چاوه‌ڕوان و به‌ هه‌سته‌وه‌ هه‌ڵده‌قوڵێ، به‌ په‌نایاندا تێده‌په‌ڕن و به‌ جێیان ده‌هێڵن.

موزیکڤانانی ناو مێترۆ له‌ جیهانی خۆیان دان، بۆیان گرنگ نیه‌ کێ له‌ په‌نایان تێپه‌ڕ ده‌بێ ، کێ سرنج ده‌دا یان ناداته‌ موزیک و هوونه‌ره‌که‌یان. ئه‌وان ، ته‌نانه‌ت هه‌ره‌ هه‌ژار و ده‌ربه‌ده‌ره‌که‌یان به‌ دڵێکی گه‌وره‌ و به‌ ئه‌وینێکی خوداییه‌وه‌، به‌شێک له‌ ژیانی خۆیان، له‌ هه‌ستی خۆیان، له‌ گیانی خۆیان ده‌که‌ن به‌ نۆتی موزیک و مێلۆدی و پێشکه‌شی ده‌که‌ن. بۆ ئه‌وان ڕه‌نگه‌ ته‌نیایی و بێ که‌سی وڵاتانی ڕۆژئاوا ته‌حه‌مول نه‌کرێ و هانی دابێتن ڕوو بکه‌نه‌ تونێله‌کانی مێترۆ و هه‌ست و ژیان و هوونه‌ریان له‌گه‌ڵ خه‌ڵکێک" هه‌رچه‌ند بشزانن سرنجیان ناده‌نێ"، دابه‌ش و هه‌ست به‌ زیندوو بوون ده‌که‌ن.

جاری وایه‌ هوونه‌رمه‌ندی زۆر بلیمه‌ت و پڕ هه‌ست و ئه‌ویندار، مرۆڤی زۆر وریا و جیهان دیده‌ و ناسک له‌ نێو موزیکڤانانی ناو مێترۆدا ده‌بینی.که‌سێک که‌ پێکه‌نین و گاڵته‌ کردن و بێ ڕێزی کردنی خه‌ڵک، کاری تێ ناکا، سرنج نه‌دانی ئه‌وان ، بایخ نه‌دان به‌ هوونه‌ره‌که‌ی نایشڵه‌ژێنێ و ناهومێدی ناکا. هات و چۆی خه‌ڵکانی نێو مێترۆ، زۆرتر و زۆرتر هانی ده‌دا بۆ ئه‌وه‌ی درێژه‌ به‌ ده‌ربڕینی هه‌ستی بدا، چاوه‌ بێ هه‌سته‌کان و هه‌نگاوه‌ تونده‌ کان و له‌ خۆبایی بوونی مرۆڤه‌کانی نێو مێترۆ پتر ئه‌وینداری ژیان و جیهانی ده‌روونی ده‌کا و زیندوو به‌وه‌یه‌ که‌ ئارام نه‌گرێ،چوونکو ئارام گرتنی به‌ مانای مردنێتی

سه‌بری ئێمه‌

2007-09-09T10:46:00.000+02:00

ئێمه‌ش سه‌بریه‌کمان هه‌بوو،سه‌بری گوڵفرۆش نالێم،سه‌بری ئێمه‌ که‌مێک له‌ من گه‌وره‌تر بوو،منی له‌ باوه‌ش گرتبوو و ده‌یانگووت که‌ منی خۆش ویستووه‌،منیش خۆشم ده‌وێ و به‌ ته‌واوی ئه‌و ساڵانه‌ خۆشم ویستووه‌.ئێمه‌ش سه‌بریه‌کمان هه‌بوو، سه‌بریه‌کی سێ چوارساڵان،قژ زه‌ردی چاو کاڵ،سه‌بری ئێمه‌ ئه‌وینداری ئاو و ڕووبار بوو،سه‌بری ئێمه‌ ئه‌وینداری ژیان بوو،ئه‌وینداری چۆمی گوندی سێ ته‌پۆڵک بوو، ڕۆژێکیان ئه‌وینداری ئاو و ڕووبار زۆری بۆ دێنێ و بۆ چنینی گوڵه‌ خاشخاشه‌کانی لێواری ڕووبار ده‌که‌وێته‌ باوه‌شی ئاو و شه‌پۆله‌کانی ڕووبار له‌گه‌ڵ خۆی ده‌یبه‌ن بۆ جیهانێکی جوانتر، جیهانێک که‌ منداڵانی چاوکاڵی وه‌ک سه‌بری ئێمه‌ لێی ده‌حه‌سێنه‌وه‌، ناگرین و ئارام ده‌گرن.هه‌موو جارێ که‌ به‌ په‌نای رووبارێک دا ده‌ڕۆم داوای لێ ده‌که‌م ئارام سه‌بری له‌ باوه‌ش بگرێ،چوونکه‌ سه‌بری زۆر ناسک بوو. داوای لێ ده‌که‌م په‌یامی دڵته‌نگی و بیر کردنی سه‌بریمی پێ بگه‌یێنێ.ئه‌رێ ئێمه‌ش سه‌بریه‌کمان هه‌بوو، سه‌بری گوڵفرۆش ناڵێم، سه‌بری ئێمه‌ ئه‌وینداری ئاو و ڕووبار بوو و هه‌ر له‌ ئاو و ڕووباریشدا ئارامی گرت.

من هه‌ڵده‌بژێرم واته‌ هه‌م

2007-09-08T15:22:00.000+02:00

کبوتر با کبوتر، باز با باز. ده‌بێ هه‌ڵبژاردن فێر بین و ڕێزیش له‌ هه‌ڵبژاردنی خه‌ڵک بگرین بۆ ئه‌وه‌ی ئه‌وانیش رێز له‌ توانایی هه‌ڵبژاردنی ئێمه‌ بگرن. من هه‌ڵده‌بژیرم.... واته‌ هه‌م

سه‌وزی سه‌وزم

2007-08-27T15:17:00.000+02:00

کلۆرۆفیلی گه‌ڵاکانم له‌ ڕێ و ڕه‌سمی ئۆکسیژێن گرتنی ڕیشه‌کانمدا سه‌رچۆپی ده‌کێشن. چیرۆکه‌کانی پێشووم ، ئه‌و چیرۆکانه‌ی پڕ بوون له‌ زه‌رد هه‌لگه‌ڕان و ویشک بوون، پڕ بوون له‌ ئافه‌تی گه‌ڵا و نه‌خۆشی ڕیشه‌ و شه‌خته‌ی زستانێکی سارد و سڕ، له‌ بیر چوونه‌وه‌ و چیرۆکێکی تازه‌ی له‌ دایک بوونم ده‌ستی پێ کرد. من دووباره‌ هه‌ڵه‌سوونم هێناوه‌.هه‌میسان له‌ سه‌رچڵی چرکه‌کانم غونچه‌کانی هیوا پشکووتن و خه‌ریکم ده‌بمه‌ دارێکی سه‌وز و زیندوو.دارێکی ڕیشه‌دار. سه‌وزی سه‌وزم، ڕیشه‌م هه‌یه‌،هیوا و ئه‌وینم دیاریه‌کی چاوه‌روان نه‌کراوی خواکانی ئه‌وینن

ماچی خودایی

2007-08-27T14:58:00.001+02:00

گلێنه‌کان له‌ ئه‌ستێره‌باران ده‌گه‌ڕین، ئاوێنه‌ ئاسا،ئاسمانی ئه‌ستێره‌ی گلاره‌ی تۆ ده‌نوێنن،ڕه‌گه‌کان زیاتر له‌ جاران هات و چۆی خوێنێکی گه‌رم له‌ خۆدا حه‌شار ده‌ده‌ن و په‌نجه‌کانی ده‌ست پڕهه‌ست ترین وزه‌ له‌ دوو ناخه‌وه‌ ده‌ده‌نه‌ دوو له‌ش و ده‌یکه‌ن به‌ یه‌ک له‌ش.دوو له‌ته‌ گۆشتی باریک و سوور،پڕ ده‌بن له‌ گه‌رما و تین و پاش به‌یه‌کدا نووسانێکی زۆر دوایین چرکه‌کانی فڕینی دووله‌شی یه‌کگرتوو به‌دی دێنن. دوو له‌ش ده‌بن به‌ خودی خودا یان خودا ده‌بارێته‌ خوار

2007-08-23T11:00:00.000+02:00

کوشتنی ژنان له‌ باشــــــــــــــوری کوردستان ،ته‌نیا كێشــــــــــــــه‌یه‌کی کۆمه‌ڵایه‌تیه‌ و به‌س؟جینایه‌ت،مرۆڤکوژی،گیان هه‌ستاندنه‌وه‌ له‌ مرۆڤێک.کێشــــــــــــــــه‌ یه‌ک و هیچی تر؟کوشتن له‌گه‌ڵ جگه‌ره‌ کێشانی منداڵ یان دژی زێر له‌ دوکانێکی ته‌ڵا و زێرفرۆشی یه‌که‌؟ بۆ کاربه‌ده‌ستانی باشوری کوردستان،کوشتنی ژنێک به‌ ئه‌ندازه‌ی دژی کردنی که‌سێک له‌ وه‌زاره‌تی ڕۆشنبیری که‌م بایخه‌.بۆیه‌ هه‌موو ڕۆژێ له‌ قه‌لادزێ و هه‌ولیر قیژه‌یه‌ک هه‌لده‌ستێ، یان ژنێک ده‌کوژرێ یان ته‌رمی ژنێک ده‌دۆزرێته‌وه‌، کار به‌ جێگایه‌ک گه‌یشتووه‌ که‌ روحم به‌ کچانی 12 ساڵه‌ وه‌ک ساراش ناکه‌ن.جه‌ند بێزارم له‌ وه‌بیرهێنانه‌وه‌ی ئه‌و بابه‌ته‌ و باس کردنی به‌ڵام چی بکه‌م کوشتن به‌ تاوانی خۆشویستن و ئه‌وین بۆ منێک که‌ پێم وابوو خه‌ڵکی وڵاتی ئه‌وین و ئه‌ویندارانم زۆر سه‌خته‌ باوه‌ڕ کردنی، بیستنی، و له‌ وه‌ش ئه‌سته‌مترهه‌لسه‌نگاندنی وه‌ک کێشه‌یه‌کی بچووکی کۆمه‌ڵایه‌تی له‌ لایه‌ن ئه‌وانه‌ی خۆیان پێ کاربه‌ده‌ست و به‌رپرسی ولاته‌که‌مه بۆ لێیان ناگه‌ڕێن خۆشه‌ویستی بکه‌ن، بۆ باڵ و په‌ریان ده‌به‌ستنه‌وه‌ ناهێڵن تامی ئه‌وین بکه‌ن؟بۆ ئه‌وه‌نده‌ به‌رچاوته‌نگن و ئیزن ناده‌ن کچان و کوڕانی وڵاته‌که‌مان ئه‌ویندار بن؟ئه‌وانه‌ی پێس به‌ ئه‌وینی کچان و ژنان ده‌گرن ، خۆیان ئه‌ویندار نه‌بوون.ئه‌وینداران سوکترین له‌ش،پاکترین دڵ و ئازادترین رووحیان هه‌یه‌.به‌ ده‌ردی نه‌نکم ده‌یگووت هه‌ر که‌س پێش به‌ ئه‌ویندار بگرێ به‌ نه‌حله‌تی خودا ده‌بێ به‌ڵام وا دیاره‌ خودا ئه‌ویندارانی کوردستان و ژنان و کچانی ئه‌وینداری له‌ بیر چۆته‌وه‌ و ئیزنی به‌کره‌ شۆڤاره‌کان ده‌دا وه‌نێویان که‌ون و ئازاریان ده‌ن و بیان نێژن.خه‌ڵکی ولاته‌که‌شم چاویان لێ ده‌که‌ن.

‌.

come away with me

2007-08-22T11:40:00.000+02:00

Come away with me in the night

Come away with me

And I will write you a song

Come away with me on a bus

Come away where they can't tempt us

With their lies

I want to walk with you

On a cloudy day

In fields where the yellow grass grows knee-high

So won't you try to come

Come away with me and we'll kiss

On a mountaintop

Come away with me

And I'll never stop loving you

And I want to wake up with the rain

Falling on a tin roof

While I'm safe there in your arms

So all I ask is for you

To come away with me in the night

Come away with me

nora jones

ئه‌وبه‌ری سنووره‌کانی ئه‌وینداری

2007-08-19T13:41:00.000+02:00

ئه‌وجاره‌شیان ئه‌ویندارم....ئه‌رێ ئه‌ویندارم. ئه‌وجاره‌یان ئه‌وینی خاك و خۆلێ ولاته‌که‌م نیه‌ که‌ پێش به‌ بۆن کردنی خۆڵی دانه‌ دانه‌ هه‌رێمه‌کانی گۆی زه‌وی بگرێ، ئه‌وجاره‌یان ئه‌وینی خوێن و ره‌گه‌زی کارداک نیه‌ نه‌هێڵێ گه‌رمای خوێنی مرۆڤێکی ئافریقا هه‌ست بکه‌م... ئه‌وجاره‌یان ئه‌وینی ئاڵا و نه‌خشه‌ی جۆغرافیایی سه‌رزه‌وی مێدیا نیه‌، ئه‌وجاره‌یان عیشقی پیتی کوردی نیه‌، ئه‌وجاره‌یان تامه‌زرۆییم هی زمانی دایکم نیه‌، ئه‌وجاره‌یان تینوویه‌تیم هی باوه‌شی لاوێکی باڵه‌به‌رزی جامانه‌ له‌سه‌ری نێو خه‌ونه‌کانم نیه‌... ئه‌وجاره‌یان خه‌م و په‌ژاره‌ و په‌رۆشی بێ وڵاتیم نیه‌، ئه‌وجاره‌یان بیر و تاسه‌ی دووری له‌ شاره‌که‌م و تاراوگه‌ نیه‌، ئه‌وجاره‌یان هه‌ستی خۆشه‌ویستی بۆ هه‌موو مندالانی هاوره‌گه‌زم نیه‌، ئه‌وجاره‌یان جیاوازه‌...زۆر جیاوازه‌.

هه‌مووی ئه‌وانه‌، پیشتر ڕه‌واندیانم، گریاندیانم، هانیان دام بنووسم،خۆشه‌ویستی بکه‌م، هانیان دام وره‌م له‌ به‌رامبه‌ریان دا زۆر بێ، هانیان دام له‌ خه‌میان دابم و له‌بیرم نه‌چنه‌وه‌،له‌گه‌ڵیان گه‌وره‌ بم و باڵا بکه‌م. هه‌مووی ئه‌وانه‌ ئێستاش له‌ دڵم دا هێلانه‌یان هه‌یه‌، هه‌موو ئه‌وانه‌ی ئیستاش وه‌ دڵه‌ کوته‌م ده‌خه‌م، وڵاتم،زمانم،مێژووم،خه‌ڵکی هاوره‌گه‌زم، لاوی کوردم، هه‌موویان ئێستاش هه‌ن و لاناچن به‌ڵام ئه‌وجاره‌یان جیاوازه‌.

ئه‌وجاره‌یان وزه‌یه‌کی ئاسمانی له‌ دوو گلێنه‌ و ڕه‌گی ده‌ستێکه‌وه‌ ده‌گاته‌ نێو دێهلیزه‌کانی دڵمه‌وه‌ ، یان من هاوره‌گه‌زیم یان ئه‌و هاوره‌گه‌زمه‌.

وزه‌ و نور هه‌موو جێگایه‌ک ده‌گرێ و وه‌ک دوانه‌ ئه‌فسانه‌ییه‌کانی چینمان لێ دێ. پێکه‌وه‌ هه‌موو شتێک ده‌توانین.جیهان ده‌گۆڕین.

به‌رده‌وام بوونم لێ مه‌پرسه‌ چوونکه‌ هه‌موومان له‌و به‌رده‌وام بوون به‌ گومانین و به‌گومان بووین ،لێی ده‌ترسین و لێی ترساوین. ته‌نانه‌ت مه‌م و زین و رۆمێئۆ و ژولیێتیش

نیگه‌رانی دایناسۆر یان ده‌عباکانی خۆمان

2007-08-18T15:20:00.000+02:00

په‌روه‌رده‌ زۆر گرینگه‌... تکایه‌ کاتێک کۆچ ده‌که‌ن و دێنه‌ ده‌ره‌وه‌ی وڵات ئاگاداری منداڵه‌کانتان بن و خۆتان به‌ په‌روه‌رده‌ کردنیانه‌وه‌ ماندوو که‌ن با نێوبانگمان به‌ بێ ئه‌ده‌بی و که‌سایه‌تی سه‌یر و سه‌مه‌ر یان خراپ ده‌رنه‌چێ. لێره‌ فێنۆمێنی سه‌یر ده‌بینی.... نه‌ کولتوری ولاتی دایکی به‌ ته‌واوی فێر بووه‌ و نه‌ به‌ ته‌واوی ئوروپاییه‌. ده‌عبایه‌کی سه‌یره‌....ئه‌ده‌ب و ڕێز گرتن نازانێ و ناشخوازێ فێربێ. ئه‌گه‌ر چه‌ند به‌ره‌ی دیکه‌ی ئاوامان هه‌بێ پیویست ناکا نیگه‌رانی له‌ناوچوونی ڕه‌گه‌زی دایناسۆره‌کان له‌سه‌ر زه‌وی بین ده‌بێ نیگه‌رانی له‌ ناوچوونی مرۆڤی کورد بین که‌ له‌ جێگای ده‌عبایه‌کی سه‌یر ده‌ژی

هه‌تا چاو بڕ ده‌کا هه‌وره‌... هه‌وره‌کان بۆرن، هه‌وره‌کان ڕه‌شن، هه‌وره‌کان بێ به‌زه‌یین، هه‌رچی ڕووناکایی و جوانیه‌ ده‌کوژن ومه‌یتی هه‌موو ئه‌و جم و جۆڵانه‌ی که‌ بۆنی ژیانیان لێ ده‌هات ڕاده‌گوێزنه‌ نێو گۆڕه‌ به‌ کۆمه‌ڵه‌کان

2007-08-09T16:00:00.000+02:00

چه‌ند خوله‌کێک له‌ ژیانی مێترۆم

به‌ هه‌ڵاتن خۆم ده‌گه‌یێنمه‌ داڵانی مێترۆکه‌وه‌، به‌ په‌له‌ هه‌وڵ ده‌ده‌م کارته‌که‌م له‌ نێو کیفه‌که‌م" که‌ له‌ شیری مریشکه‌وه‌ هه‌تا گیانی ئاده‌میزادی تێدایه‌" ، ده‌ربێنم. پاش ئه‌وه‌ی نینۆکێکم ده‌شکێ و که‌مێکی ده‌ستم داده‌ڕووشێ و زیپی ساکه‌که‌شم نابه‌سترێته‌وه‌ و هه‌ڵده‌قڵیشێ، کارته‌که‌م ده‌ردێنم. خۆم به‌ یه‌کێک له‌ ماشێنه‌کان دا ده‌که‌م بۆ ئه‌وه‌ی کارتی لێده‌م، ئه‌وڕۆ شانسم هێناوه‌ و که‌س له‌ پێشمه‌وه‌ گیری نه‌کردوه‌ و ڕێگای ماشێنه‌کان چۆڵن، کارت لێ ده‌ده‌م و دێمه‌ ده‌ر له‌ پڕدا قورساییه‌ک له‌ سه‌ر ملم و له‌ پشت لاقم هه‌ست ده‌که‌م، ئاوڕێک ده‌ده‌مه‌وه‌، کوڕێکی ڕه‌ش کارتی پێ نیه‌ و خۆی به‌ منه‌وه‌ هه‌ڵواسیوه‌ بۆ ئه‌وه‌ی بێته‌ ده‌ر......ماشه‌ڵا به‌ قوربانی ڕووی بم ده‌ڵێی به‌رده‌ پێیه‌" هی قه‌زوین ناڵێم چوونکه‌ ئیستا تاقیم نه‌کردۆته‌وه‌" . له‌ پلیکانه‌کان دێمه‌ خوار ، مێترۆکه‌ دێ بڕوا خۆمی تێ ده‌ ئاخنم

ماوه‌یه‌ک تێ ده‌په‌ڕێ، له‌ یه‌کێک له‌ وێستگه‌کان که‌ ڕایگرتووه‌، رووبه‌رووی من سه‌نده‌ڵیه‌ک به‌تاڵه‌، له‌ په‌نای ژنێکی به‌نازی له‌ هه‌ره‌ به‌ نازه‌کان وا به‌ باوه‌شێنێکی سه‌یر خۆی باوه‌شێن ده‌کا دانیشتووه‌، له‌وبه‌ریشمه‌وه‌ ژنێکی له‌و به‌نازتر خه‌ریکی خوێندنه‌وه‌ی شته‌. له‌ پڕدا دیسان هه‌ست به‌ هێش له‌ لاقمدا ده‌که‌م.... کاتی ئاوڕدانه‌وه‌م پێ ناهێڵێ، ورچێک،نا گوریلێک به‌ڵام به‌ راستی گوریل ها، له‌وانه‌ی وا له‌ کارتۆنی گوریله‌نگوری دابوون، دێ و شه‌قێکیش له‌ لاقی ژنه‌ به‌نازه‌که‌ی رووبه‌رڕووم ده‌دا و ده‌چێ به‌رامبه‌ر به‌ من و له‌ په‌نای ژنه‌ به‌نازه‌که‌ داده‌نیشێ. ناوێرم سه‌رم هه‌ڵێنم و چاو له‌ سه‌رێ که‌م به‌ڵام لاقی به‌ قه‌ت لاقی هه‌ر دووکمان ده‌بێ و که‌وشه‌کانی ده‌ڵێی ناوگانی نیزامین. هانکه‌ هانکی هه‌تا چه‌ند میتر ئه‌ولاتریش ده‌چێ. ده‌ی هیچ ناڵێن و قه‌تاره‌که‌ ده‌ڕوا. ئێستا ته‌واو دوور نه‌که‌وتووینه‌توه‌، بیلامانێ ده‌نگی بای لێ ده‌بێته‌وه‌ و بۆگه‌نێک هه‌موو دونیا ده‌گرێ،دیسان ناوێرم سه‌رم هه‌ڵبێنم چوونکه‌ به‌دشانسم و ده‌ترسم دیسان تووش بم. ئه‌وه‌نده‌م ئاگا لێیه‌، ژنه‌که‌ی ئه‌وبه‌رمانه‌وه‌ هه‌لده‌ستێ و په‌نجه‌ره‌که‌ ده‌کاته‌وه‌. له‌ پڕدا ده‌نگی قیژه‌....نا گوڕه‌ ،ئه‌ویش نا، ده‌نگی دێوێک دێ و تێر تێر جنیو ده‌دا و خه‌ریکه‌ هه‌موومان له‌ ژێر پێی ورد بکا و هه‌روا به‌ خۆرایی به‌ هیلاک بچین. داده‌چڵه‌کێم و خێرا هه‌ڵدێم به‌ره‌وه‌ ده‌رگاکه‌ی پشته‌وه‌. کابرا بۆگه‌نی له‌ هه‌موومان به‌رداوه‌ ، لاقی دوانمانی بریندار کردوه‌،قه‌رزداریشمان ده‌کا. خێرا داده‌به‌زم و دیسان ڕاده‌که‌م به‌ره‌و قه‌تارێکی دیکه‌

ڕێێله‌کان ، کاتێک به‌ په‌له‌ین زۆر به‌ ئه‌سپایی ده‌جوڵێنه‌وه‌، به‌ روح له‌ ژن و پیاوی چه‌مه‌دان به‌ ده‌ست تۆقیوم چوونکه‌ هه‌موو رێیله‌کان ده‌گرن و جێگای ڕه‌ت بوون ناهێڵنه‌وه‌. ئه‌وجاره‌شیان دیسان تووش بووم. هه‌ر جۆرێکه‌ له‌ رێیلیش نه‌جاتم ده‌بێ به‌ڵام به‌ داخه‌وه‌ 2 خووله‌ک دره‌نگتر ده‌گه‌مه‌ قه‌تاری دووهه‌م و مه‌جبورم بۆ دوو خووله‌ک ، 30 خوله‌کی تر راوه‌ستم چوونکه‌ خه‌تی ئه‌و شوێنه‌ی بۆی ده‌چم تووشی ڕووداو بووه‌ و گرفتی هه‌یه‌. هه‌ر ئاوا راوه‌ستاوم و چاو له‌ تابڵۆکان ده‌که‌م، له‌ پڕدا هه‌ست ده‌که‌م که‌سێک لێم نیزیک بۆته‌وه‌ و چاوم لێ ده‌کا، به‌ ئه‌سپایی سه‌رم هه‌لدێنم بزانم کێیه‌....چاوتان شتی خراپ نه‌بینێ یاخوا....... هه‌یولایه‌کی مه‌ست ، نا ببورن شوالیه‌که‌م، ئه‌ویش نا پره‌نسی نێو خه‌ونه‌کانم به‌ خۆی و به‌ بوتری ویسکیه‌که‌یه‌وه‌، بۆگه‌نی وڵاتی هه‌لگرتووه‌ و له‌ نیو ئه‌و هه‌موو پره‌نسێس و کیژه‌ جوانه‌ی خه‌ونه‌کانی ڕاست بۆ به‌دبه‌ختی من ، منی نه‌خۆشی داماوی، تووڕه‌ی نیگه‌رانی هه‌ڵبژاردوه‌ که‌ بۆ ئه‌وه‌ی دره‌نگ نه‌گه‌مه‌ سه‌ر کار حازرم هه‌موو ریسکێک بکه‌م، و خه‌ریکه‌ وشه‌ حاشقانه‌کانی وا به‌ هۆی مه‌سره‌فی زۆری ئه‌لکۆل هه‌مووی سه‌راونخوون بوون ، پێشکه‌شی من ده‌کا به‌شکوو دڵم بۆی لێ دا و ماچێکی ئه‌و ڕواله‌ته‌ مه‌سته‌ی بکه‌م. هه‌تا قه‌تاری ئازیز دێ و من له‌و وه‌زعه‌ ڕزگار ده‌کا، هه‌زار جار ده‌مردم و زیندوو ده‌بمه‌وه‌. که‌ داشده‌به‌زین ، بۆ 5 خووله‌ک زووتر گه‌یشتن خه‌ریکن پاڵمان پیوه‌ده‌نێن و لاق و ده‌ستمان ده‌شکێنن. ئه‌وڕۆ زۆر باشتر بوو ته‌نیا 3 جار پاڵیان پێوه‌ نام

2007-08-01T11:32:00.000+02:00

ئێمه‌ وه‌ک گوڵدانێک، کاسه‌یه‌ک، قاپێک، گۆزه‌یه‌ک ده‌چین، بۆ ئه‌وه‌ ساز کراوین ئاوێکی پاک و ڕوونمان تێ که‌ن و تینووه‌کان ئاودیر که‌ین........به‌ڵام بۆخۆمان زه‌هر و دوژمنایه‌تی و شه‌ڕ و ئازار له‌ خۆمان ده‌که‌ین و ژیانه‌کانی پێ له‌ ناو ده‌به‌ین

2007-07-31T16:59:00.000+02:00

ئاسایی،ئاسایش

2007-07-30T11:30:00.000+02:00

ڕواڵه‌تت وا هه‌رگیز فریا نه‌که‌وتم کوڵمه‌کانی ماچ که‌م، باڵات وا هه‌رگیز نه‌متوانی خۆم به‌ باسکه کانیه‌وه‌ هه‌ڵواسم و به‌ زۆر جێگایه‌کی بچووک بۆخۆم بکه‌مه‌ باوه‌ش، ئه‌و وشانه‌ که‌ قه‌ت نه‌یانتوانی له‌ زارت بێنێ ده‌ر و فانتێزی خۆشه‌ویستی نێو سه‌رم ئاو بدێرن. بیر کردنی ئه‌و شتانه‌ی نه‌بوون و نین و نابن. بۆ؟

چی ده‌بێته‌ دیوارێک و پێش به‌ تێکهاڵانی لاولاوه‌کان ده‌گرێ؟چی ناهێڵێ سنوور ببه‌زێنین و هه‌رێمی بێ سنوور تاقی که‌ینه‌وه‌؟ ترس.... ترس له‌وه‌ی تێپه‌ڕبوونی کاته‌کان، ته‌ڕی ماچه‌کان ویشک هه‌ڵگه‌ڕێنن و له‌وه‌ی که‌ باسکه‌کان پاش باوه‌شێک هه‌ڵبێنه‌وه‌ و کوته‌ک ئاسا جه‌سته‌یه‌ک شین که‌نه‌وه‌. ئه‌رێ ده‌ترسم و ده‌ترسی.... ترس له‌ گۆڕانی فۆنتی دڵڕفێنی خۆشویستن بۆ پیتی قین و تووره‌یی. ترس له ئاسایی بوونی ئه‌و چرکه‌ بێ وێنانه‌ی قه‌ت نه‌یانده‌توانی له‌ دایک بن و ئێستا له‌ دایک بوون. له‌ ئاسایی بوون ده‌ترسم

بودا ده‌ڵێ هه‌وڵ بۆ ئاسایشی ژیان بده‌......ئاواته‌کانم ئاسایشیان نیه‌، هیواکانم بێ ئاسایشن،به‌ره‌و پێشچوونی من و هه‌زاران و میلیۆنان مرۆڤی تر نائاساییه‌، ئاسایشی له‌ لایه‌ن هه‌زاران هێزه‌وه‌ له‌ مه‌ترسی دایه‌، مه‌ترسی برسێتی،بێکاری، ون بوونی ئازادی، مه‌ترسی شه‌ڕ و شه‌ڕخوازی، خورافات و تابۆ، مه‌ترسی خۆخۆشویستن و ده‌سه‌ڵاتخوازی، خۆ ون کردن، مه‌ترسی و نه‌بوونی ئاسایش ته‌نانه‌ت هیواشت لێ ده‌ستێنێته‌وه‌. هیوا مه‌گه‌ر چیه‌؟ ته‌نیا 1 میلیاردومی چرکه‌یه‌ک هه‌ست به‌ بوون کردنه، هه‌ستیارترین ڕووناکایی نێو دڵه‌.....هه‌موو شتێک به‌ هاسانی ئاسایشی هیواکان و ژیانمان ده‌خه‌نه‌ مه‌ترسیه‌وه‌. ئێمه‌ بوونه‌وه‌رێکی زۆر ناسکین، ئه‌سته‌مێکه‌ له‌ نێوان بوون و نه‌بوونمان. که‌ ئه‌و ئه‌سته‌مه‌ نه‌ما ئێمه‌ش نابین. زۆر خه‌مناکه‌ به‌ڵام وایه‌. لاوازترین بوونه‌وه‌رین

مێتۆدۆلۆژی تازه‌ی کوردایه‌تی

2007-07-26T17:02:00.001+02:00

هه‌ر که‌س له‌ خۆت نه‌چوو و وه‌ک خۆت بیری نه‌کرده‌وه‌ و ئه‌ندامی حیزبه‌که‌ت نه‌بوو و ڕخنه‌ی لێ گرتی ده‌توانی به‌ خۆت ئیزنی ئه‌وه‌ بده‌ی نێوی بنێی جــــــــــــــــــــــــــــــــــــاش. ئاوا هاسان ........ راستی؟ به‌ منیشیان گووتوه‌

له‌ مرۆڤێکی نیوه‌ ئازادی ولاتێکی نیمچه‌ ئازاده‌وه‌ بۆ ئازادبیرێکی نێو زیندانه‌کانی ولاتێکی به‌دیل گیراو

2007-07-21T15:14:00.000+02:00

نووسینی تۆ ، بیره‌کانت، بوونه‌ میله‌کانی زیندان، فڕین و به‌رز بوونه‌وه‌ت ، هه‌تا حه‌وت ئاسمان ده‌نگ هه‌ڵبڕینت زنجیرێکیان له‌ لاق هاڵاندی و ئیستاش ڕانه‌وه‌ستانت ، حوکمی له‌ سێداره‌ دانی بۆ بڕیوه‌ته‌وه‌. راسته‌ له‌ زیندان دای، ئه‌شکه‌نجه‌ چی به‌ جیسمی ماندووت نه‌کردوه‌، ڕاسته‌ ئازاره‌کانت زۆرن، به‌ڵام تۆ سووکترین له‌شی کوردی سه‌ر زه‌وی وا هیچ پێویستێکی به‌ رووح نه‌ماوه‌ و خۆی خودی روحه‌ و زیندووکه‌ره‌وه‌. سه‌برت بێ ، ڕۆژێک دادێ ، بردنی نێوت جه‌سته‌ی هه‌موو تینوویه‌کی ئازادی ئاودیر ده‌کا و زیندوو بوونه‌وه‌ له‌ سه‌ر لاپه‌ڕه‌ی جم و جۆلێ ژیانیان ده‌نووسێ

بۆ ڕفاندنی نیگای پیاوێک

2007-07-18T10:54:00.000+02:00

به‌ درێژایی مێژوو فیداکاریمان کردوه‌، کاری سه‌یر و سه‌مه‌ره‌مان کردوه‌ بۆ ئه‌وه‌ی پیاوان پێمان بڵێن جوانن، له‌بارن، بۆ ئه‌وه‌ی ئێمه‌یان به‌ دڵ بێ، لوتمان و گوێمان و نێوکمان کون کردۆ، قژمان یان درێژ درێژ کردۆ یان پاک پاک تاشیومانه‌، هه‌زار ره‌نگمان داهێناوه‌ و له‌ قژ و لێو و پشت چاومان داوه ، بۆ ئه‌وه‌ی به‌ دڵی پیاوی سه‌نگدڵ بین. هه‌زار ئازارمان به‌ خۆمان گه‌یاندوه‌. ئه‌دی ئه‌وان چییان بۆ ئێمه‌ کردۆ بۆ ئه‌وه‌ی به‌ دڵمان بن؟ بڵێی ئێستاش پیاوێکی کورد بۆ شیرینه‌که‌ی شاخ هه‌ڵکه‌نێ؟ بلێی ئێستاش سیامه‌ند له‌ ڕێگای ئه‌وینی خه‌جدا هه‌تا مردن بڕوا؟ بلێی پیاوێکی کورد وه‌ک مه‌م مابێ و هه‌موو سه‌ختیه‌ک بۆ ژنێک ته‌حه‌مول بکا؟ من پێموایه‌ مرۆڤی ئه‌و سه‌رده‌مه‌ به‌ پیاو و به‌ ژنه‌وه‌ ، ڕاحه‌ت ته‌ڵه‌بن، پێیان خۆشه‌ ژن یان پیاو به‌ بێ هیچ سه‌ختیه‌ک له‌ بن ده‌ستیان بۆیان ئاماده‌ بن. کوڕه‌ کورده‌کانمان زه‌حمه‌تی نازکێشانی هیچ کچێک به‌ خۆیان ناده‌ن، ئاماده‌ نین وڵات بۆ هیچ کچێک به‌جێ بهێڵن یان ده‌ست له‌ کاریان هه‌ڵگڕن. دڵیان نایا پوڵ بۆ هیچ کچێک خه‌رج که‌ن، ئه‌وانه‌ هه‌موو فیدای سه‌ریان له‌ ژنێکی ده‌وله‌مه‌ند ده‌گه‌ڕێن که‌ ده‌ستی به‌ ده‌می بگا و بۆ ئه‌وانیش خه‌رج بکا. هاوار به‌ ماڵم گووتم جیهان بگۆڕێ ، کوردیش مۆدێرن بێ به‌ڵام نه‌ک ئاواش. ئه‌و که‌وشانه‌ ، سه‌رده‌می کۆن هی ژنانی چینی بوون‌ بۆ ئه‌وه‌ی لاقیان چکۆله‌ بێ و تێیدا جیگای بێته‌وه‌ لاقیان بڕیوه‌ و بۆ لاق چکۆله‌ دیار بوون خۆیان کۆڵه‌ کردۆ.خوداش ده‌زانێ دوایه‌ تووشی چیها نه‌خۆشی و ئێش ‌بوون

خۆجوان کردنی ژن به‌و کارانه‌ و ئازاردان به‌ خۆی ئه‌گه‌ر بۆخۆی و بۆ دلێ خۆی بێ شتێک، به‌ڵام ئه‌من شکم هه‌یه‌، بۆ دڵی پیاوه‌ و بۆ ئه‌وه‌ی پیاو خۆشی لێیان بێ. ئه‌و هه‌موو ئازاره‌ بۆ وه‌ده‌ستهێنانی نیگایه‌کی پیاو

سێبه‌ر-نیسێ

2007-07-17T18:18:00.001+02:00

خوار و خێچم
ئاڵۆز و په‌شۆکاو
هیچ په‌رگارێک ناتوانێ دایره‌ی سه‌رم خڕ ڕاگرێ
خه‌ت کێشه‌کان له‌ ڕاست کردنه‌وه‌ی جه‌سته‌م داماون

له‌ ون بوونی هه‌تاو ده‌ترسم

دیسان کات

2007-07-17T18:10:00.000+02:00

کات دره‌نگ تێپه‌ڕ ده‌بێ بۆ ئه‌وه‌ی چاوه‌ڕوانه‌
زوو ده‌ڕوا بۆ ئه‌وه‌ی ده‌ترسێ
دور و درێژه‌ بۆ ئه‌وه‌ی خه‌مێکی له‌ دڵ دایه‌
کورت بۆ ئه‌وه‌ی شادمانه‌ و
هه‌تاهه‌تاییه‌ بۆ ئه‌وه‌ی ئه‌وینداره‌

بۆ سێ که‌س‌

2007-07-17T10:19:00.000+02:00

تۆ بۆ ئێلیزه‌ت وت، تۆ بۆ ئێلیزه‌ت نووسی، تۆ بۆ ئێلیزه‌ت ڕێک خست. منیش بۆ دڵفراوانی که‌سی یه‌که‌م، بۆ زانستی ئه‌وی دووهه‌م و بۆ هه‌ستیاری دانه‌ی سێهه‌م. ئێستا ئێلیزه‌یه‌ک دڵفراوانی زانای هه‌ستیار له‌ دایک نه‌بووه‌

ئه‌ستێره

2007-07-16T11:21:00.000+02:00

ئه‌ستێره‌کان، له‌ ئاسمانی ژیانمدا ئه‌ستیره‌ زۆر بوون، ئیستاش زۆرن، ئه‌و ئه‌ستێرانه‌ی خێرا بێ ئه‌وه‌ی لێیان بگێرمه‌وه‌ خۆیان به‌ کوولانه‌ی ژینم دا ده‌که‌ن و هه‌ر به‌و خێراییه‌ش، به‌جێم دێڵن به‌ڵام ئه‌ستێره‌ ته‌نیا ئه‌و ئه‌ستێره‌یه‌ی وا قه‌ت به‌ جێی نه‌هێشتووم و هه‌موو شه‌وێ له‌ سه‌ر سه‌رم ده‌دره‌وشێته‌وه‌، بۆ دیتنی ، بۆ دوانی ، بۆ ئه‌وه‌ی ئه‌و کاتانه‌ی پێویستم پێیه‌تی بێته‌ لام، پێویست ناکا بانگی که‌م، ته‌نیا ئاسمانێکی ڕوون و بێ هه‌ور بۆ به‌دی کردنی به‌سه‌. ئه‌ستێره‌یه‌ک وه‌ک خۆم ئاواره‌ و ته‌نیا

ڕوانگه

2007-07-12T16:40:00.000+02:00

بیابانێکی ویشکم بۆ مه‌کێشه‌وه‌، من له‌ بیابان، به‌رینی و ئاواڵه‌یی و ئۆکسیژێن و خۆڵی گه‌رم گه‌رمم کردوه‌ به‌ وێنه‌. باسی مه‌ترسی ده‌ریام بۆ مه‌که‌، من ده‌مهه‌وێ له‌ ده‌ریا، شینایی و ده‌نگی شه‌پۆله‌کان به‌ مێشکم بسپێرم. هه‌تا که‌نگێ پێم ده‌ڵێی با و گه‌رده‌لوول وێرانکه‌رن؟ من له‌ بادا فێنکایی روح و له‌ گه‌رده‌لوول خۆشی جاروبار تووره‌ بوونێک ده‌دۆزمه‌وه‌

تۆ باسی هیچم بۆ مه‌که‌، پێم مه‌ڵێ چی باشه‌ و چی ناباشه‌، بڕواکانم بۆ شی مه‌که‌وه‌، گروپه‌کانم بۆ پێناسه‌ مه‌که‌، تاقیکردنه‌وه‌ له‌ خوێنم دایه‌، ناتوانم به‌ بێ خوێن زیندوو بم

شه‌وه

2007-07-08T14:28:00.000+02:00

ڕه‌ش پۆشێک دێ،پڕ پڕ له‌ گلۆبوڵی ڕه‌ش‌
پێکه‌نینی ڕه‌شی ڕێگه‌ به‌ هه‌موو قاقاکان چۆڵ ده‌کا
بۆنی سۆی جه‌سته‌یه‌کی سووتاو و ڕه‌ش دێ

ئه‌وه‌ مه‌له‌که‌ی وڵاتی به‌فر و ساردی نیه‌
منداڵێک به‌ زۆر هان بدا وشه‌ی عه‌داڵه‌تی به‌ له‌تکه‌ سه‌هۆڵ بنووسێ

ئه‌وه‌ شای وڵاتی شه‌وه‌
گه‌وره‌کان به‌ره‌و جه‌هه‌نمی خۆڵه‌ مێشێکی ڕه‌ش ده‌سته‌مۆ ده‌کا

attitude

2007-07-04T16:44:00.000+02:00

Please , when you change your glasses;

change your attitude too.
All tragedies begin with broken attitudes.

Be a freind

2007-07-01T11:54:00.000+02:00

Be a friend.

You don't need money;

Just a disposition sunny;

Just the wish to help another

Get along some way or other;

Just a kindly hand extended

Out to one who's unbefriended;

Just the will to give or lend,

This will make you someone's friend.

Be a friend.

You don't need glory.

Friendship is a simple story.

Pass by trifling errors blindly,

Gaze on honest effort kindly,

Cheer the youth who's bravely trying,

Pity him who's sadly sighing;

Just a little labor spend

On the duties of a friend.

Be a friend.

The pay is bigger

(Though not written by a figure)

Than is earned by people clever

In what's merely self-endeavor.

You'll have friends instead of neighbors

For the profits of your labors;

You'll be richer in the end

Than a prince, if you're a friend.

~ Edgar Guest ~

ڕازی مانه‌وه‌م

2007-07-01T10:53:00.000+02:00

شه‌ڕ شه‌ڕ ده‌زێته‌وه‌،خراپه‌، خراپه‌ و ڕق، قینی زیاتر. که‌ نه‌توانم به‌ وته‌کانم پێش به‌ خراپه‌کانت بگرم ، ڕێگاکه‌مت له‌ جیا ده‌که‌مه‌وه‌، خۆمت لێ ناده‌م، لێت ناترسم، خۆکشانه‌وه‌ له‌ تۆ نیشانه‌ی ترسم نیه‌، زۆر ئاساییه‌، ئه‌گه‌ر بڵێم ڕێگای مانه‌وه‌ی هه‌میشه‌ییم ، دوورکه‌وتنه‌وه‌ له‌ تۆ و ڕێگا ڕه‌شه‌که‌ته‌

تۆ حه‌سودی به پێکه‌نینی‌ منداڵێکی هه‌تیو و باب مردوو ده‌به‌ی ، تۆ ڕقت له‌ داروبه‌رد و ئاسمانه‌
تۆ ده‌خوازی ئه‌وینێک که‌ پێشکه‌شی تۆ نه‌کرێ قه‌ت پێشکه‌ش نه‌کرێ. لێت تووڕه‌نیم ، تووره‌ بوون بۆ بوونه‌وه‌رێکه‌ که‌ تووڕه‌یی ڕایده‌چڵه‌کێنێ ،که‌ نه‌توانم به‌ وته‌کانم پێش به‌ خراپه‌ بگرم ، خۆمت لێ ناده‌م ، ڕێگاکه‌مت لێ جودا ده‌که‌مه‌وه‌

رافائێل

2007-06-25T09:49:00.000+02:00

caravane

Est-ce que j'en ai les larmes aux yeux
Que nos mains ne tiennent plus ensemble
Moi aussi je tremble un peu
Est-ce que je ne vais plus attendre
Est-ce qu'on va reprendre la route,
Est-ce que nous sommes proches de la nuit
Est-ce que ce monde a le vertige
Est-ce qu'on sera un jour puni
Est-ce que je rampe comme un enfant
Est-ce que je n'ai plus de chemise
C'est le Bon Dieu camarade
C'est le Bon Dieu qui nous brise
Est-ce que rien ne peut s'oublier
Puisqu'il faut qu'il y ait une justice
Je suis né dans cette caravane
Et nous partons allez viens
Allez viens
Tu lu tu, tu lu tu...
Et parce que ma peau est la seule que j'ai
Que bientôt mes os seront dans le vent
Je suis né dans cette caravane
Et nous partons allez viens
Allez viens
Tu lu tu, tu lu tu...
Allez viens
Tu lu tu, tu lu tu...

من له‌ نێو ئه‌و کاروانه‌دا له‌ دایک بووم
وه‌ره‌، وه‌ره‌، ئێمه‌ ده‌رۆین

2007-06-21T14:52:00.000+02:00

ناسین

2007-06-14T11:31:00.000+02:00

by picaso

پێم خۆشه‌ ئاشکرابی
به‌ڵام ‌ ڕه‌گه‌ شینه‌کان
ئێسکه‌ ڕه‌ق و ته‌قه‌کان
‌ ڕووت بوونه‌وه‌
ده‌مترسێنێ

کچانی وڵاتی شه‌ڕه‌ف

2007-06-12T10:14:00.000+02:00

tugba tunc

shawbo alî

pêla atroshî

hêshu yunês

doa xelîl

benaz mehmud

کوشتنی کچان به‌ تاوانی دۆستایه‌تی له‌گه‌ڵ پیاوێک یان شکاندنی داب و نه‌ریت و بردنی شه‌ره‌ف و حه‌یای پیاوانی کورد... بۆ ئێمه‌ ئه‌و دیارده‌یه‌مان هه‌یه‌؟

یه‌کێک کوتی: ئێمه‌ی کوردی ئێران له‌وان باشترین...ژن هه‌ڵده‌گرین، کچمان ڕه‌دوو ده‌که‌وێ و ئاشت ده‌بینه‌وه‌ و نایانکوژین. یه‌کێکی دیکه‌ کوتی، له‌ داخی پیاوی کورد و کۆمه‌ڵگای کوردی مێرد ناکه‌م به‌ کورد و مێرد ده‌که‌م به‌ پیاوێکی ئوروپایی.

کابرایه‌کی کاربه‌ده‌ستی حکوومه‌تی هه‌رێمی کوردستان کوتی: ئه‌و دیارده‌یه‌ ده‌بێ پێشی پێ بگیرێ به‌ڵام ناشتوانین کۆمه‌ڵگا له‌ دار ده‌ین چوونکه‌ نه‌ریتێکی کۆمه‌ڵگایه‌ که‌ په‌ره‌ی سه‌ندوه‌. پیاوێکی دیکه‌ له‌وانه‌ی وا هه‌ست به‌ داڕووشانی په‌رده‌ی شه‌ره‌فی کردبوو وتی: ژنان و کچانی ئێمه‌ ده‌بێ حه‌یا بکه‌ن و به‌ ره‌فتاری قورس؟ نیشاندان له‌ خۆیان شه‌ڕه‌فی کورد له‌ کوردستان و ده‌ره‌وه‌ی وڵات بکڕنه‌وه‌. ژنێک له‌ولاوه‌ وتی: کچه‌کانی بنه‌ماله‌ی ئێمه‌ له‌ ئوروپاش له‌ دایک بوون قه‌ت له‌گه‌ڵ کوڕ نابن و حه‌یای ئێمه‌یان پێ له‌ که‌یف و خۆشی خۆیان گرینگتره‌. کچ ده‌بێ ڕێز له‌ داب و نه‌ریتی کورد بگرێ. کورێک له‌ولاوه‌ سمێڵی باده‌دا و ده‌ڵێ کوڕ کوڕه‌ و کچ کچه‌...من وه‌ک کوڕ قه‌ت کچێک ناهێنم له‌وه‌پێش له‌گه‌ڵ کوڕێک خۆشه‌ویستی کردبێ

دۆینێ گاردیه‌ن بوو...هه‌واڵی دادگایی کردنی باوک و مامی به‌نازی کوژراو به‌ تاوانی بێ حه‌یایی وه‌ک تیتری یه‌که‌می خۆی زه‌ق کردبۆوه‌ و هه‌موو دونیا خوێندیه‌وه‌، ئه‌وڕۆ بی بی سی به‌شی فارسی زه‌قی کردۆته‌وه‌...سه‌رم دێشێ، ماندووم. بۆ چرکه‌یه‌کیش بێ نامهه‌وێ کورد بم. قسه‌که‌ی بابم دێته‌وه‌ بیرم و که‌مێک دڵم له‌ کووتانی زۆر ڕاده‌وه‌ستێ و هیوادار ده‌بمه‌وه‌... بابه‌ گیان هه‌رچه‌ند نه‌ماوی و ئێستا له‌ نێو هه‌وره‌کانی ئاسماندا ته‌ماشام ده‌که‌ی....هه‌رچه‌ند به‌ زیندوویی قه‌درم نه‌زانی، به‌ڵام سپاست ده‌که‌م...سپاست ده‌که‌م که‌ ئازادت په‌روه‌رده‌ کردم و ئازادیت بۆ شی کردمه‌وه‌... له‌بیرمه‌ کوتت...هه‌ر که‌سێکت پێ خۆش بوو هه‌ڵیبژێره‌...ئه‌گه‌ر خه‌ڵکی زه‌وی ئێمه‌ش نه‌بێ و له‌ کۆره‌ی مێریخه‌وه‌ هاتبێش... ڕێز له‌ هه‌ڵبژاردنه‌که‌ت ده‌گرم... به‌ڵام فێر به‌ به‌ ئازادی خۆشت بوێ و شانازی به‌ خۆشویستنه‌که‌ی بکه‌...قه‌ت له‌ ترس و شه‌رمی که‌س خۆشویستنی که‌سێک به‌ دزیه‌وه‌ مه‌که‌ و مه‌یشاره‌وه‌. سپاس بابــــــــــــــــــــــــــــــــــــــــــــــــــــــــــــه‌ گیان

شه‌ره‌فی کورد له‌ گاردیه‌ن دا

2007-06-11T18:05:00.000+02:00

تیتری گاردیه‌نیش ، کوژرانی کچانی کورد به‌ تاوانی شه‌ڕه‌ف

‌

20

2007-05-31T09:26:00.000+02:00

،ژیانێکه‌

ئه‌و 20 ساڵــــــــــــــــــــــــــــــــــــــــه‌

یار درخانه‌ و ما گرد جهان میگردیم

2007-05-30T16:51:00.000+02:00

مه‌گه‌ڕێ
خۆت، خه‌ونه‌ ونبووه‌که‌ت

نیگه‌رانی بۆ؟
بوونه‌وه‌رێکی‌ دڕه‌نده‌ی نێو داستانه‌کان

ناڕۆن
له‌ تێپه‌ڕکردنی شته‌کاندا قاره‌مان بوون

ته‌نگ بوونی چاوه‌کانت
حه‌سود، بوونی نیه‌ خۆمان خۆدی گوناحین

من تووڕه‌م

2007-05-30T16:23:00.001+02:00

من تووڕه‌م
له‌ چاوه‌کان
کاتێک له‌ سه‌ر زه‌وی ده‌تروکێن
له‌ ئاسمان
بۆ سۆما ده‌گه‌ڕێن.

من تووڕه‌م
له‌ دڵه‌کان
کاتێک خۆیان میوانی دڵێکی سووتاون و
کارتی بانگێشتن بۆ دڵێکی داگیرکراو ده‌نێرن.

لێیده‌وه

2007-05-24T15:24:00.000+02:00

by Shivan-h

ئه‌وڕۆ بوومه‌ 29 ساڵ

2007-05-22T15:46:00.000+02:00

Everything's been different

All the day long,

Lovely things have happened,

Nothing has gone wrong.

Nobody has scolded me,

Everyone has smiled.

Isn't it delicious

To be a birthday child?

Rose Fyleman

kurdish woman

2007-05-20T15:18:00.000+02:00

1979-mariwan-sine road

Illustration

2007-05-13T16:06:00.000+02:00

By: Michael Mucci

خۆت داپۆشه، هۆنا ئیرانۆن‌

2007-05-12T16:43:00.000+02:00

ئێره‌
ئێره‌ش

به‌ ژن و کچه‌کانتان بڵێن، سه‌رچاوه‌ی هه‌موو فیتنه‌کان و پیسیه‌کان و ده‌ست درێژی و چاو حیزیه‌کانی پیاوانمان، سه‌رچاوه‌ی هه‌موو کێشه‌ ئه‌تۆمی و سیاسیه‌کانمان، ریشه‌ی هه‌موو هه‌ژاری و به‌دبه‌ختی و ناله‌باری زانستی و ئابوریمان ............. قژی دانه‌پۆشراو و ده‌ست و لاقی رووتیان و مانتۆ و شه‌ڵواره‌ کورته‌کانیانه‌
به‌ ژنان و کچه‌کانتان بڵێن ئه‌گه‌ر سه‌رچاوه‌که‌ ئه‌وانیش نه‌بن.... فایده‌ی نیه‌،چه‌نه‌ لێ مه‌ده‌ن چوونکه‌ جارێ هیچی ترمان نه‌دیوه‌ته‌وه‌ بۆ ئه‌وه‌ی مێشکی خه‌ڵکه‌ به‌دبه‌خته‌که‌مانی پێ بخافڵێنین و ئه‌وانیشی پێ بچه‌وسێنینه‌وه

نه‌جاتمان ده‌ن

2007-05-09T11:16:00.000+02:00

نه‌جاتمان ده‌ن

نازانم بونیادی نه‌ورۆز کێن و چی ده‌که‌ن، ئه‌و فیلمه دووهه‌مین فیلمه‌ له‌و مانگه‌دا که‌ ده‌مهاژێنێ،مێشکم شپرزه‌ ده‌کا و هانم ده‌دا زۆر زۆرتر له‌ جاران بیر له‌ به‌دبه‌ختیه‌کانی کورد بکه‌مه‌وه. ناشزانم ئه‌و فیلمه‌ له که‌مپی کورده‌کان ، له‌ چ شوێنێک گیراوه‌، به‌ڵام ده‌نگی ئه‌و کچه‌ چکۆله‌یه‌م هه‌ر له‌ سه‌ر دایه‌ که‌ ده‌ڵێ: نه‌جاتمان ده‌ن......... نه‌جاتمان ده‌ن

وێنه

2007-05-06T15:05:00.000+02:00

هه‌ڵپه‌ڕکێی خه‌م ‌

مۆدێلی کوردانه‌

پیاو : بۆ پێشه‌وه‌

ژن : وه‌دواکه‌وتوو

source: national library of australia

قاره‌مانانی وڵاتی به‌رد

2007-05-01T14:01:00.000+02:00

بلوزێکی سوور و دامه‌نێکی ڕه‌ش ، به‌ به‌رد دادڕاون،خۆلێکی زه‌رد تێکه‌ڵی خوێن بووه‌. ئاه و ناڵه‌ی کچێک له‌گه‌ڵ ده‌نگی بلوک و به‌رد و وشه‌ی " قه‌حبه‌" تێکه‌ڵ بووه‌. ده‌سته‌ زه‌لامه‌کان به‌ به‌رده‌ باران شل بوون.چاوه‌ وه‌حشیه‌کان به‌ خۆیان و به‌ کامێرای موبایله‌وه‌،وه‌ک لاشخۆر له‌ ڕووتی جیسمێکی بریندار ده‌گه‌ڕێن

گاڕانێک دوو پێ، له‌ ڕه‌گه‌زی نیژادێکی بێ وڵات ده‌وری کارمامزێکی خوێناویان داوه‌ و به‌ شه‌ق و مست و بلوک و جنێو پیاوه‌تی خۆیانی پێ ده‌سه‌لمێنن. بژین قاره‌مانانی پاسه‌وانی شه‌ڕه‌ف و حه‌یای کورد. چاکتان سه‌لماند وشه‌ی پیاوه‌تی و گه‌وره‌یی جینسی نێر، باشتان نیشان دا مێژووی له‌بیر نه‌کراو و ئه‌فسانه‌ی ئاخی ژنی عه‌شیره‌تتان

هه‌تا هه‌تایه‌،خاکی ئه‌و ولاته‌ خۆی له‌ سه‌ر به‌خۆییتان لا ده‌دا، هه‌تا هه‌تایه‌ سنووره‌کان بۆ ئازادکردنی خۆڵ و خاکتان ناکشێنه‌وه‌،هه‌تا هه‌تایه‌ ده‌سته‌کانتان له‌ خوێن و دڵکانتان له‌ نه‌فره‌ت و مێشکه‌کانتان له‌ ویشکایی ڕزگاری نابێ و دایکی کوردستانیش سه‌رشۆڕانه‌ فرمێسکی داگیربوونی هه‌میشه‌ییتان بۆ هه‌ڵده‌ڕێژێ

ئێوه‌ له‌ نیژادی له‌بیربراوه‌کانن. خۆتان به‌دیلگیراوی خۆتانن. دوژمنانتان له‌ کرده‌وه‌تان شه‌رمێون تر له‌ خۆتان،دراوسێکانتان، له‌ دڵڕه‌قیتان، بیزارتر له‌ خواکانتان. کارمامزه‌کانی وڵاتی ئێوه‌ ، قوربانیه‌کانی ڕق و قینی بێ کۆتاییتانن. بژین ئه‌ی قاره‌مانانی مه‌یدانی شه‌ڕه‌ف و پیاوه‌تی، نواندنی هێزی ئێوه‌ ته‌نیا دژ به‌ کارمامزی خاک و خۆڵی خۆتانه‌ و به‌س

مه‌رگی شه‌ونم

2007-04-25T17:27:00.000+02:00

ئاواته‌کان له‌گه‌ڵ شه‌ونمێک ده‌بارێنه‌ سه‌ر زه‌وی و ورده‌ ورده‌ ویشک ده‌بن و له‌ تینوویه‌تی خۆڵ و خاکدا ون. هه‌موو به‌یانیه‌ک به‌ڵام، له‌ خه‌و هه‌ڵده‌ستم و درۆیه‌کی گه‌وره‌ ده‌که‌مه‌ چرپه‌ی گوێم و له‌ چاوانی ئه‌و دا له‌ هیوا ده‌گه‌ڕێم

ئه‌گه‌ر هیواکانی من ده‌بنه‌ شه‌ونمێک و له‌ خۆڵ و خاکی زه‌ویدا ده‌ویشکێن، هیواکانی ئه‌و سه‌ربه‌ستانه‌ دێن و ده‌چن و هه‌تا ئه‌وپه‌ڕی جیهانی هیوا باڵ لێ ده‌ده‌ن. جاران فێرببووم ،هه‌موو ئێواره‌یه‌ک هیواکانم له‌ نێو خۆڵ و خاكی ئه‌و زه‌ویه‌ به‌ پرسه‌ و قاو و قیژ بنێژم و ئێستا زۆر بێ ده‌نگانه‌ ، له‌ ئێواره‌یه‌کی پڕ له‌ ته‌نیایی خۆم و منێکی ماندوو و بێ هێزدا، به‌ بێ ده‌نگی، شه‌ونم له‌ باوه‌شی خۆڵ ده‌نێم و به‌ قه‌ت هه‌موو خه‌مه‌کانم ده‌گریم

هیچ چاره‌یه‌ک بۆ نه‌زۆکی گلاره‌ی چاوه‌کانم نادۆزمه‌وه‌،هیچ منداڵی فرمێسکێک پاش ناشتنی شه‌ونمه‌کان له‌ دایک نابنه‌وه‌.زۆر ده‌ترسم ورده‌ ورده‌ له‌ ویشکاییه‌کی نه‌فره‌ت بار دا ون بم و چی تر هێزی ناشتنی کۆرپه‌ی جوانه‌مه‌رگی شه‌ونمیشم نه‌مێنێ و هه‌روا ، بێ ناز له‌ خۆڵدا جێی بهێڵم

به‌دبین

2007-04-25T16:53:00.000+02:00

ده‌ڵێن به‌دبین مه‌به‌،ده‌ڵێن ئه‌وه‌ راست نیه‌ که‌ ژنی کورد مافی خوراوه‌ یان ده‌خورێ، ژن و کچی کورد خه‌تای خۆیانه‌،زۆریان ڕوو بده‌یه‌ی هار ده‌بن، ده‌ڵێن فێمێنزیمێکی خه‌ته‌رناکی، ده‌ڵێن ژن ده‌سه‌ڵاتی بده‌یه‌ی وڵات ده‌خوا، ده‌ڵێن لێی گه‌ڕێن با کوردستان ڕزگار که‌ین جا باسی مافی ژن بکه‌ن، ده‌ڵێن ژن قه‌ت وه‌ک پیاو نایه‌ته‌وه‌............. پیاوی وڵاته‌که‌م؟ ببمبوورن که‌ هار بووم، بمبوورن که‌ وڵات ده‌خۆم، بمبوورن که‌ بێ ئه‌وه‌ی بزانم فێمێنیزم چیه‌ مۆری فێمێنزمتان لێ داوم، بمبوورن که‌ باوه‌ڕم پێتان نیه‌، بمبوورن که‌ هه‌میشه‌ لێتان ده‌ترسم که‌ ڕۆژێک لێتان ده‌رچێ و به‌ پێچه‌وانه‌ی وته‌کان، وه‌ک هه‌میشه‌ له‌ ده‌سه‌ڵات و لێهاتوویی ژنه‌کانی ده‌ورووبه‌رتان بترسن و پێتان خۆش بێ هه‌میشه‌ له‌ پاش ئێوه‌وه‌ هه‌نگاو بنێن و وه‌پێشتان نه‌که‌ون

به‌ راستی بمبوورن که‌ ژنێکی ناسکی شه‌رمێونی ، قانعی ، بێ ده‌نگی ، هه‌میشه‌ ده‌م به‌ پێکه‌نینی له‌باری نێو خه‌ونه‌کانتان نیم و جار جار به‌ نقورچکێک وه‌خۆتان دێنمه‌وه‌ و خۆشم و ژنه‌ نقورچک وه‌شێنه‌کانی تر تاوانی داچڵه‌کاندنتان ده‌ده‌ین

چاوێک به‌سه‌ر ئه‌و فیلم و سایته‌دا بخشێنن و پاشانیش بمبوورن که‌ ناتوانم باوه‌ڕ به‌ چاک بوونه‌وه‌ و وته‌ شووشه‌ییه‌کانتان بکه‌م و هه‌ر درێژه‌ ده‌ده‌م به‌ نقورچک لێ گرتنتان به‌شکوو ڕۆژێک له‌ خه‌و ڕاپه‌ڕن و چرای عه‌داڵه‌ت له‌ سێلوله‌کانی مێشک و دڵتاندا هه‌ڵگیرسێنن

http://www.jamawar.net/

هه‌ڵه‌بجه

2007-03-16T19:05:00.000+01:00

کاتێک هه‌تاو،یه‌که‌م هه‌نگاوی به‌ره‌و سه‌راولێژی ته‌پۆڵکی ڕۆژ ده‌پێوێ، نۆزده‌ ساڵی مردنت،قژه‌کانی به‌رامبه‌ر به‌ هه‌موو ئاوێنه‌کانی به‌هه‌شت ده‌هۆنێته‌وه‌.
نۆزده‌ په‌ری دێنه‌ سه‌ردانی زه‌وی و له‌ په‌نای دیواری ره‌نگ و ڕوو پێوه‌ نه‌ماوی‌ کۆڵانه‌کانی هه‌ڵه‌بجه‌، نه‌فه‌سه‌کانیان ده‌ده‌نه‌ منداڵان و بۆنی سووتان له‌ جه‌ژنی نۆزده‌ساڵانی مردنت ده‌تارێنن.

داخ،هه‌زار داخ، ژنان و پیاوانی هه‌ڵه‌بجه‌، 19 ساڵه‌،چاوه‌کانیان بۆ خوا ناردوه‌

Minallékí aware

2007-03-09T10:45:00.000+01:00

Minallékí aware

Minallékí aware bú le sharan

Hénde girya, héndey nallan

Dewreya da melayíke u períy asman

Le gell xoyanda birdyan

Bo hezaranSharí jiwan jiwan

Bo beheshtí ferawan

Beheshtí pirr estérey shín

Hezar hezar bú keshúshe u

Shekre séw u henarí zérrínyan dayé

Hezar hezar pifílikí rengawreng u

Míwey tursh u mizir u shíríníyan dayé

Girya u girya u firméskí risht wekú baran

Hawarí kird:

Ére kiwéye? erromewe bo níshtiman

le Letíf Hellmet

2007-03-08T16:12:00.000+01:00

یه‌که‌م یاسای مافی ژن له‌ ساڵی 1791 به‌ ده‌ست دوو ژنی فه‌رانسه‌وی به‌ نێوی ، ماری

ئۆله‌مپ دۆگوش و مێریکور نووسراوه که‌ هه‌ردوکیان له‌ لایه‌ن ده‌سه‌ڵات و ئه‌و پیاوانه‌ی دژی مافه‌کانی ژن بوون له‌گه‌ڵ توند و

تیژی رووبه‌روو بوونه‌وه‌ و پاش ئه‌وه‌ی به‌ ڕووتی به‌ شاردا گه‌راندیانن، شێت بوون

ئه‌گه‌ر ده‌تانهه‌وێ بارودۆخی ژن بگۆڕی،ئه‌وانه‌ بگۆرن ئه‌ی ئه‌وانه‌ی له‌ ماڵی ژن و کچه‌کانتان بێ قسه‌ی ئێوه‌ نابی نه‌فه‌س بکێشن و ڕۆژی جیهانی ژنتان کردۆته‌ بیانوویه‌ک بۆ قسه‌ی زلتان

هه‌شتا له‌ سه‌دی کرێکارانی هه‌ژار ژنن
شازده‌ له‌ سه‌دی ئه‌وانه‌ی داهاتی که‌میان هه‌یه‌ ئه‌و دایکانه‌ن وا به‌ ته‌نیا منداڵه‌کانیان به‌خێو ده‌که‌ن
ژنان هه‌میشه‌ یازده‌ ده‌رسه‌د که‌متر له‌ پیاوان پاره‌ ده‌ردێنن
هه‌شتا له‌ سه‌دی ئه‌و کارانه‌ی نیوه‌ وه‌ختن و به‌ که‌م داهاتیان هه‌یه‌ هی ژنانه‌
ته‌نیا حه‌وت له‌ سه‌دی ژنان له‌ به‌شی به‌ڕیوه‌به‌رایه‌تی ئیداره‌کانی جیهان دا کار ده‌که‌ن

سه‌رچاوه‌: یو ئێن ئێس ئا

ماده‌ سه‌گ ؟

2007-02-23T16:30:00.000+01:00

کاتی خۆی که‌ له‌ ئێران منداڵ بووم، له‌ تێلێوزیونی ئێران، به‌شی ده‌نگ و باس، فیلمی ژنێکی قژدرێژی ئیسرائیلیان نیشان دا که‌ وه‌ک پۆلیس له‌ ژنانی فه‌له‌ستینی ده‌گه‌ڕا و ده‌ستگیری ده‌کردن و ده‌یخستنه‌ نێو ماشێنی پۆلیسه‌وه‌ و به‌و شێوه‌یه‌ پێویستی نه‌ده‌کرد کچ و ژنی فه‌له‌ستینی به‌ ده‌ست پیاو ده‌ستگیر کرێن. پێشکه‌شکه‌ری ده‌نگ وباسه‌که‌ی تێلێوزیۆنی ئێران ئه‌و ژنه‌ی وه‌ک " ماده‌ سه‌گ" نێو نا و وتی ئه‌و ماده‌ سه‌گه‌ که‌وتۆته‌ گیانی ژنان و کچانی فه‌له‌ستینی. ئێستا ئه‌و وێنانه‌" هه‌رچه‌ند کۆنن" من وه‌بیر قسه‌ی ئه‌و پێشکه‌ش که‌ره‌ ده‌خاته‌وه و پێم ده‌ڵێ، ئه‌ی ئه‌و ژنه به‌سیجیه‌‌ که‌ له‌ کچان و ژنانی ئێرانی ده‌دا و به‌ زۆر ده‌یانخاته‌ نێو ماشێنی پاسداره‌کانه‌وه‌ نێوی چیه‌؟

"ڕۆژی جیهانی زمانی دایکی"زگماگی

2007-02-20T14:00:00.000+01:00

بیست و یه‌کی فێبریه‌ی 2000 ، له‌ لایه‌ن نه‌ته‌وه‌ یه‌کگرتوه‌کان و یونێسکۆوه‌ وه‌ک ڕۆژی جیهانی زمانی دایکی"زگماگی" ناسراوه‌. ئه‌و ڕۆژه‌ به‌ مه‌به‌ستی ناساندن و تێگه‌یشتنی زیاتر له‌ خه‌ڵکی تر و پاراستنی زمانی زگماگی و ئه‌رکی زمانه‌کان له‌ پاراستنی مرۆڤ و شارستانیه‌ت، به‌ ڕۆژی جیهانی زمانی زگماگی یان زمانی دایکی نێودێر کراوه‌

له‌ ڕۆژێکی وادا،21 ی فێبریه‌ی 1952 ، پێنج خوێندکاری به‌نگلادێشی، له‌ داکا، بۆ ئه‌وه‌ی زمانی به‌نگالی ببێته‌ زمانی فه‌رمی به‌نگلادێش" که‌ ئه‌و کات به‌ پاکستانی ڕۆژهه‌ڵات ناسرابوو" گیانیان به‌خت کرد

زمانی کوردی له‌ کوێیه‌؟بۆ کوێ ده‌چێ؟ من ته‌نیا دوو قسه‌م هه‌یه‌ له‌سه‌ر زمانی دایکم ، زمانی کورد.1. ئێستا زاراوه‌ و ڕێنووسێکی تایبه‌ت و هاوبه‌شمان هه‌ڵنه‌بژاردوه‌ که‌ هه‌موومان له‌سه‌ری بۆ نووسین و شوێنی فه‌رمی و ئیداری هاوده‌نگ بین، هه‌ربۆیه‌ هه‌رکه‌س هه‌ڵده‌ستێ به‌ شێوازی خۆی ده‌نووسێ و ئه‌وی تری قه‌بووڵ نیه‌ و به‌ که‌یفی خۆی ده‌کا و ته‌نانه‌ت نووسین له‌ مێدیا و ڕوژنامه‌نووسیشمان دا بۆته‌ کێشه‌یه‌ک و که‌س که‌سی قه‌بووڵ نیه‌ و هه‌ر چی هه‌لده‌ستێ مامۆستای زمانی کوردی لێ ده‌ردێ و ئه‌گه‌ر ده‌سه‌ڵاتیشی بێ، ئه‌وه‌ی خۆی داده‌سه‌پێنێ

2. زمانی کوردی تامێکه‌، چێژێکه‌ که‌ زۆر یه‌ک له‌ ئیمه‌ به‌ ته‌واوی نه‌مانبووه‌. بۆ منی‌ کوردێک که‌ قه‌ت نه‌متوانیوه‌ له‌ قوتابخانه‌ و فێرگه‌یه‌ک پێی بخوێنم و فێری بم، ئێستاش نه‌ ته‌نیا له‌ زۆر وشه‌ و ماناکانی و له‌ زۆر جیهانی چیرۆک و ئه‌ده‌ب و مێژوو ی کورد ئاگاداریم نیه‌، به‌ڵکوو هه‌ست ده‌که‌م خۆم لێ ون بووه‌. ئه‌و به‌شه‌ له ئاگاداری و زانست له‌سه‌ر خۆم و کورد و کوردستان که‌ ده‌بێ هه‌بێت، یان نایزانم ، یان سه‌رچاوه‌م نه‌دۆزیته‌وه‌ و سه‌رچاوه‌ به‌ زمانی کوردی ده‌ست ناکه‌وێ و هه‌ست به‌ به‌تاڵی ده‌که‌م . فه‌رهه‌نگی شه‌فاهی له‌ نێو ئێمه‌دا له‌ فه‌رهه‌نگی نووسین به‌هێزتره‌، ئه‌وه‌ش ده‌گه‌ڕێته‌وه‌ سه‌ر ئه‌وه‌ی ، سه‌رده‌مێکی زۆر که‌مه‌ ئێمه‌ به‌ زمانی دایکی ده‌خوێنینه‌وه‌ و ده‌نووسین

ناساندنی فیلم

2007-02-17T14:03:00.000+01:00

داوید و له‌یلا، فیلمێکی کۆمێدی سیاسیه‌، لێره‌ , باس له‌ ئه‌وینی داوید، کورێکی جووله‌که‌ی ڕۆژنامه‌ڤانی تێلێویزیۆن و له‌یلا،کچێکی سه‌ماکه‌ری کورد ده‌کا که‌ به‌ پێچه‌وانه‌ی ویستی خانه‌واده‌ی هه‌ردوولا که‌ یه‌کیان جووله‌که‌ و ئه‌وی تر موسوڵمانن،ئه‌وینداری یه‌کن و ده‌یانهه‌وێ له‌گه‌ڵ یه‌ک بژین

2007-02-16T16:27:00.000+01:00

ژنێکی شیرازی به‌ هۆی جل و به‌رگ و سه‌ردانه‌پۆشینی به‌ ته‌واوی ئێره‌ ، له‌ لایه‌ن" خواهر" ێکی به‌سیجی قسه‌ی پێ ده‌گووترێ و ئه‌ویش نایکاته‌ نامه‌ردی و ده‌ردی ده‌داتێ............. له‌بیرمه‌ کاتێک له‌ تاران خوێندکار بووم ، نۆره‌ی من بوو ئه‌و جاره‌یان بچمه‌ بازاڕ و خواردن بکڕم، پاش شت کڕین ، له‌ ڕێگا ده‌هاتمه‌وه‌، هه‌ر دوو ده‌ستم پڕ بوو له‌ ساکی میوه‌ و گۆشت و دۆدیو بۆدی ،شانیشم کۆڵه‌یه‌کی پێوه‌ بوو، له‌ نێو ئۆتوبوسه‌که‌دا ڕاوه‌ستام ، به‌لام له‌چکه‌که‌م له‌ نیوه‌ی سه‌رم به‌رببۆوه‌ و ده‌ستم گیرابوو و ئۆتوبوسه‌که‌ ئه‌وه‌نده‌ قه‌ره‌باڵغ بوو نه‌م ده‌توانی ده‌ست به‌رم و له‌چکه‌که‌م چاک که‌م. کاتێک له‌ ئۆتۆبوس دابه‌زیم، ژنێکی چارشێوی خۆش حیجاب له‌ پشته‌وه‌ بانگی کردم و وتی: " ببخشید دخالت میکنم خانوم ولی اگه‌ میشه‌ روسریتونه‌ بیارید جلو، درست نیست اینجوری" . منیش نه‌مده‌زانی چی بڵێم. له‌ لایه‌که‌وه‌ ده‌ستم پڕ بوو، له‌ لایه‌کی تره‌وه‌ ده‌مویست بیگرم و وه‌ک ئه‌و ژنه‌ شیرازیه‌ تێری بکوتم

من ئێبلیسم کاتێک خۆم نیم

2007-02-16T15:50:00.000+01:00

پێویستم به‌ نه‌سه‌فێک هه‌یه‌ بۆ ئه‌وه‌ی بگه‌ڕێمه‌وه‌ بۆ دواوه‌.کێ ده‌ڵێ من داهاتووم له‌ دۆینێ و ئه‌وڕۆم له‌ داهاتووم خۆشتر ده‌وێ؟ کاتێک چرکه‌کان بۆ من جێگای شانازین که‌ هی خۆم بن و به‌ ده‌ستی خۆم کاریان بۆ بکه‌م و به‌ بیری خۆم تێپه‌ڕیان که‌م

ڕه‌نگه‌ که‌سێکی ئانارشیستی بێ پره‌نسیپی بێ به‌رنامه‌ بم که‌ له‌ چوارچێوه‌ی هیچ نه‌زم و یاسایه‌کدا که‌ ئه‌وی تر به‌سه‌رم دا بسه‌پێنێ، نه‌توانم خۆم بگونجێنم، به‌ڵام ته‌نیا شانازی به‌و کاتانه‌وه‌ ده‌که‌م که‌ خۆم بووم،چرکه‌کان هی خۆم بوون و نه‌فه‌سێکی خۆمانه‌م تێدا هه‌ڵده‌کێشان

نازانم بۆ ده‌بێ شه‌رم بکه‌م یان بترسم کاتیک ده‌ڵێم: من له‌ چوارچێوه‌ی بیر و باوه‌ڕ و ئۆتۆریته‌ و ده‌سه‌ڵاتی یه‌کی تر دا ناتوانم که‌سێکی باش بم. بۆ ده‌بێ شه‌رم بکه‌م له‌وه‌ی که‌ بڵێم ناتوانم له‌ ژێر ده‌سه‌ڵات و بیر و پره‌نسیپی یه‌کی تر دا " که‌ له‌وانه‌یه‌ له‌گه‌ڵ ئه‌وه‌ی من عه‌رز و ئاسمانی فه‌رق بێ" فریشته‌ بم و سه‌ر دانه‌وێنم و خوێنم شیرن بێ و که‌سێکی چاکم لێ ده‌رچێ... من له‌ چوارچێوه‌ی بیر و باوه‌ڕ و پره‌نسیپی که‌سێکی تر دا کار بکه‌م ده‌بمه‌ شه‌یتان،ده‌بمه‌ خۆدی ئێبلیس و ده‌بمه‌ به‌دجنسترین بوونه‌وه‌ری جیهان.... چوونکه‌ خۆم نیم...... من ته‌نیا له‌ چوارچێوه‌ی بیر و هه‌ست و پره‌نسیپه‌کانی خۆم دا "که‌ به‌ زه‌حمه‌ت و بیر کردنه‌وه‌ و ته‌مه‌ن تێپه‌ڕکردنی خۆم پێیان گه‌یشتووم " بژیم ده‌بمه‌ که‌سێکی ئازاد و فریشته..... ئه‌و فریشته‌یه‌ی نه‌فه‌س ده‌کێشێ و نه‌فه‌س ده‌به‌خشێ................. ناشمهه‌وێ که‌س له‌ چوارچێوه‌ی بیره‌کانی مندا بژی و کار بکا چوونکه‌ ده‌زانم ئه‌ویش ده‌بێته‌ منی ئێستا و خۆدی ئێبلیس......... ناحه‌قیشی ناگرم

پێکه‌نین

2007-01-30T16:12:00.000+01:00

پێکه‌نین هه‌یه‌ هه‌تا پێکه‌نین، ئه‌وه‌ پێکه‌نینی کچێکی 19 ساله‌ی کورده‌ که‌ له‌ سه‌ر به‌رگری له‌ خۆی بۆ ماوه‌ی دوو ساڵ" له‌ ته‌مه‌نی 17 ساڵی دا" ، که‌وته‌ زیندان و چاوه‌ڕێی حوکمی ئیعدامی ده‌کرد. نازه‌نین به‌ هاوکاری ئه‌وانه‌ی مرۆڤایه‌تی و ژیانیان خۆش ده‌ویست ، ئازاد ده‌کرێ و ده‌چێته‌وه‌ باوه‌شی ژین.پێکه‌نینه‌که‌ی پێکه‌نینی ئازادییه‌،پیرۆزی بێت، هه‌رچه‌ند ده‌زانم , ژیانی دوای زیندان و ژیان له‌ ئیرانێکی دژی کوردی، دژی ژنی به‌ قسه‌ و باس ، ئازادی مانایه‌کی ئه‌وتۆی نیه‌

منداڵی و گه‌وره‌یی، گه‌وره‌یی و منداڵی

2007-01-29T09:57:00.000+01:00

من منداڵێکی گه‌وڕه‌م و تۆش گه‌وره‌یه‌کی منداڵ یان به‌ پێچه‌وانه‌وه‌، گرینگ نیه‌، کاممان یه‌که‌مین و کاممان دووهه‌م.گرینگ ئه‌وه‌یه‌ پێکهاتووین له‌ منداڵی و گه‌وره‌ییمان

تۆ له‌گه‌ڵ هه‌موو شتێک کایه‌ ده‌که‌ی و هه‌موو خه‌ونێکیشت پێ راسته‌.من به‌ڵام........ کایه‌ی هه‌موو تۆفان و ده‌ریایه‌کی شڵه‌ژاوی وه‌رزه‌ سارده‌کانم و هه‌موو راستیه‌کانیش خه‌ونی وه‌دی نه‌هاتوومن

بووکه‌ شووشه‌ی تۆ ، 20 ساڵێک ده‌بێ ده‌ستی شکاوه‌ و بۆت چاک نابێته‌وه‌،منیش خۆم بووکێکی شپرزه‌م وا خۆشم و ده‌ست و لاقم له‌ قه‌ره‌باڵغی جیهاندا لێ ون ده‌بێ

ئازار

2007-01-15T18:00:00.000+01:00

هه‌رچه‌ند ده‌زانم ئه‌و وێنانه‌ زۆر خه‌مناکن و له‌وانه‌یه‌ تووشی ناخۆشیمان بکه‌ن به‌ڵام راستیه‌کی حاشاهه‌ڵنه‌گرن.راستیه‌ک که‌ به‌سه‌ر ئێمه‌ی کورد هاتووه‌.ئه‌و وێنانه‌ مندالانی کوردن له‌ کاتی په‌نابه‌ری و کۆچ به‌ڵام به‌ داخه‌وه‌ نازنم له‌ لایه‌ن کێ و چ سه‌رچاوه‌یه‌که‌وه
.گیراون

2007-01-01T16:15:00.000+01:00

دۆینێ شه‌وێ،پاریس ده‌ینه‌ڕاند،خه‌ڵک هاواری شادیان ده‌هات.جیرانه‌کان هه‌تا به‌یانی به‌ هه‌موو موزیکێکی هیندی،چینی،عه‌ره‌بی،فه‌رانسه‌وه‌ی ، ئینگلیسی و ته‌نانه‌ت ئیندیه‌نی ئامریکای لاتینیش هه‌ڵده‌په‌ڕین و ته‌په‌ ته‌پی سه‌مایان ده‌هات

نۆئێلی من؟ من به‌ ناردنی چه‌ند کارتێکی پۆستاڵ بۆ ئه‌وانه‌ی کورد نه‌بوون و جیژنه‌که‌ جێژنی ئه‌وان بوو به‌ره‌وپیری ساڵی تازه‌ چووم. ئه‌وشۆش چه‌ند ئێس ئێم ئێسێکی دۆستانم به‌ ده‌ست گه‌یشت و خۆشم یه‌ک دوانی دیکه‌م بۆ پیرۆزبایی گووتن بۆ به‌ڕێ کردن

ئه‌و چه‌ند ڕۆژه‌ پیس سه‌رمام بووه‌ و له‌ ماڵێ که‌وتووم. ئه‌وڕۆ هه‌ستام هاتمه‌وه‌ سه‌ر کار. نۆئیلی من پڕ بوو له‌ کۆخه‌کۆخ و بۆنی ده‌رمان و شه‌ربه‌ت و سوپ و نیسکێنه‌ خواردن و شه‌وی ڕابردووش خه‌ریکی خوێندنه‌وه‌ی کتێبێک بووم به‌ نێوی ، وته‌ی منداڵانی شه‌ڕ‌ , که‌ بیره‌وه‌ری مندالانه‌ له‌ شه‌ڕی جیهانی یه‌که‌مه‌وه‌ تا ئێستا

پێم وایه‌ نابێ خۆم فریو ده‌م، قه‌ت کریسمه‌س یان نۆئێل به‌ جه‌ژنی خۆم نازانم. ئه‌وڕۆ دیمه‌نی ساڵی تازه‌ له‌ زۆربه‌ی وڵاتانی جیهانم چاو لێ کرد و تێیدا کچ و کوڕ و پیاو و ژنی له‌ من به‌ ته‌مه‌نتر هه‌موو هوڕا ده‌کێشن و یه‌ک ماچ ده‌که‌ن و هه‌ڵده‌به‌زن و شاییانه‌. ئه‌ی خودا، بۆچی من ناتوانم ئه‌وه‌نده‌ شاد بم؟

نۆئێلی من پڕه‌ له‌ گله‌یی و گازنده‌ی خۆم له‌ ئه‌و و ئه‌و و گله‌یی ئه‌وانیش له‌ من، گوێم چڵکی کردۆ،گه‌رووم دێشێ،گوڵه‌که‌م له‌ باڵکۆن ئه‌وه‌نده‌ باران لێێدا تا ویشک هه‌ڵگه‌را.خولاسه‌ نۆئێل ، نۆئیلی من نیه‌. لێره‌ شه‌پڵاغه‌یه‌ک،ماچێکی سه‌ر خه‌یابان و مه‌شروب خواردن، سونه‌تی سه‌ری ساڵی فه‌رانسه‌ویه‌.من نیسکێنه‌ ده‌خۆم و قسه‌کانی زۆلاتا،کلارا،هۆدا،شیران ، شێیلا و ئه‌وانی تر ده‌خوێنمه‌وه‌ و جار وباریش چاوم پڕ ده‌بێ له‌ ئاو

له‌ خه‌به‌ره‌کان دا ده‌خوێنمه‌وه‌ که‌ له‌ فه‌رانسه‌ نزیکه‌ی 7 میلیۆن هه‌ژار ده‌ژین. پێم وایه‌ له‌وه‌ زۆرتر بن. ژاکی خۆشه‌ویستیش ئه‌وه‌ هه‌ر به‌ڵێنی ده‌دا ماڵ بۆ بێ ماڵان ساز که‌ن و له‌ ساڵی تازه‌دا هه‌ژاره‌کان له‌ ناوبه‌رن و بیانکه‌نه‌ ده‌وڵه‌مه‌ند

ئه‌ی خودا نۆئێلی من بۆ ئه‌وه‌نده‌ دڵته‌نگه‌؟ دۆینێ شه‌وێ ، چه‌ند چرکه‌یه‌ک پێش سڵاو کردن له‌ 2007 سه‌رم هه‌ڵهێنا و به‌ لاسا کردنه‌وه‌ی دۆستانی فه‌رانسه‌وه‌ی دۆعایه‌کم کرد........ بڵێی مه‌سیح و خودا بمبینن؟نازانم. دۆعام کرد خودا کورد عاقڵ کا،ئاواته‌کان وه‌دی بهێنێ و منیشی پێوه‌ نووسێنێ ، جا نازانم خودا چه‌نده‌ی وه‌رگرت و چه‌نده‌شی وه‌لانا، گووتی قسه‌ی مفتن

ناساندنی کتێب

2006-12-08T17:08:00.000+01:00

نێوی کتێب: من ئازادیم هه‌ڵبژارد
نووسه‌ر: نادیا ڤۆلف

ئه‌و کتێبه‌ ئۆتۆبیۆگرافی ژنێکی پزیشکی ڕوسه‌ که‌ به‌ هۆی جووله‌که‌ بوونی له‌ لایه‌ن کۆمه‌ڵگا و سیستێمی سیاسی روسیه‌وه‌ ، زوڵم و زۆر و گوشارێکی زۆری له‌سه‌ره‌ و بێ عه‌داڵه‌تی و هه‌ڵسوکه‌وتی نیژادپه‌ره‌ستانه‌ ده‌بینێ و هه‌ر بۆیه‌ مه‌جبور ده‌بێ له‌گه‌ڵ مێرد و کوره‌ چکۆله‌که‌ی له‌ ترسی کا گێ بێ، به‌ دزیه‌وه‌ ، له‌ ڕێگای فه‌نلانده‌وه‌ ، خۆی بگه‌یێنێته‌ سنووری فه‌نلاند و له‌وێشه‌وه‌ بگاته‌ فه‌رانسه‌ و داوای په‌نابه‌ری بکات

له‌و بارودۆخه‌ ناله‌باره‌دا که‌ خوێندن بۆ جووله‌که‌کان ئاسان نه‌بووه‌ و له‌ نێو 600 کاندیدی زانکۆی پزیشکی، ته‌نیا 6 جووله‌که‌یان هه‌ڵبژاردوه، نادیا وه‌رده‌گیرێ و له‌ به‌شی عه‌سه‌ب ناسی درێژه‌ به‌ خوێندن ده‌دا و دواتر پسپۆڕیکی باشی لێ ده‌ردێت و هه‌ر ئه‌وه‌ش ده‌بێته‌ هۆی گوشاری زۆری کا گێ بێ. له‌و کاته‌دایه‌ که‌ نادیا بیر له‌ خۆی و مێرده‌که‌ی ناکاته‌وه‌ به‌ڵکوو بۆ ڕزگاری کوره‌که‌ی و بۆ ئه‌وه‌ی ئه‌و ناخۆشیه‌ی ئه‌و و مێرده‌که‌ی چێشتوویانه‌،ئه‌و نه‌یچێشێ، ڕوو ده‌کاته‌ ده‌ره‌وه‌ی وڵات و به‌ شه‌وێکی تاریک و سارد ، کوڕه‌که‌ی له‌ کاپوتی ماشێنه‌که‌ی ده‌خا و بۆ فه‌نلاند هه‌ڵدێ

ئۆتۆبیۆگرافی ئه‌و ژنه‌ زۆر له‌ ژیانی ئێمه‌ی کورد له‌ ئێران که‌ له‌سه‌ر کورد و سونی بوون و ته‌نانه‌ت ژن بوونمان له‌ زانکۆ گرفتی درێژه‌ دان به‌ خوێندن و کار کردنمان هه‌بوو ، ده‌چێ. زۆریشمان هه‌ر به‌و ره‌فتاره‌ نیژادپه‌ره‌ستانه‌وه‌ که‌ ده‌بووه‌ هۆی ئه‌وه‌ی له‌گه‌ڵ کور و کچه‌ فارس و شیعه‌کان ، یه‌ک ده‌رفه‌تی کاری و خوێندنمان نه‌بێ یان به‌ هۆی ترس له‌ ژیانی خۆمان یان منداڵه‌کانمان ئاواره‌ی هه‌نده‌ران بووین و وه‌ک نادیا ئازادیمان" هه‌رچه‌ند 100 له‌ سه‌دیش نه‌بێت" هه‌ڵبژاردوه‌

2006-12-08T14:13:00.000+01:00

سه‌رچاوه ; ئه‌و وێنه‌یه‌ ، سێ ژنی مه‌هابادین له‌ ساڵی 1940 گرتراوه‌

2006-11-10T17:17:00.000+01:00

ویستم له‌سه‌ر کابرایه‌ک بنووسم که‌ ساڵانێکی زۆر فه‌رمانده‌ی پێشمه‌رگه‌کان بووه‌ و له‌ شاخ و کێوی کوردستان ژیاوه‌ و به‌ تفه‌نگ و ده‌ستووردانه‌وه‌ ژیاوه‌ و ئێستا له‌ وڵاتێک که‌ هی خۆی نیه‌ و شاخیشی لێ نیه‌ ، به‌ قه‌ڵه‌مێک که‌ به‌قه‌ت تفه‌نگه‌که‌ سارد و ئه‌ستوور نیه‌ ده‌یهه‌وێ ده‌ستوور بدا به‌ که‌سێک که‌ قه‌تی به‌ ژیانی پێشمه‌رگایه‌تی هیچ نه‌کردوه‌، ته‌نانه‌ت زۆریشی له‌ پێشمه‌رگه‌ و شه‌ڕی شاخ شت له‌ بیر نه‌ماوه‌.... دوایه‌ که‌مێک ڕاوه‌ستام و گووتم جا ئه‌وه‌ من باسیشم کرد و له‌سه‌ریشی ڕۆیشتم کوا ده‌توانم به‌ نووسینه‌که‌م ئه‌و بگۆڕم یان یه‌کی تر له‌ وجوودی ئه‌و و شیوازی ڕه‌فتاره‌کانی ئاگادار که‌مه‌وه‌

ویستم په‌سوۆردی ئی مه‌یله‌که‌می پێ بده‌م و به‌و کاره‌ پێی بڵێم که‌ من و ئه‌و یه‌کین و هیچ له‌ یه‌ک ناشارینه‌وه‌ و دوایه‌ ڕاچڵه‌کیم و گووتم ........ من له‌سه‌ر ئه‌و به‌زمه‌ ره‌فیقێکم له‌ ده‌ست دا که‌ بۆچی بێ ئاگادارکردنه‌وه‌ و پرسینی بیری من که‌سێکی تری به‌ نێوی خۆشه‌ویستی هێناوه‌ته‌ نێو گۆڕینه‌وه‌ی وته‌ و نووسینه‌کانمانه‌وه‌

ویستم ئه‌وڕۆ زام و خه‌مه‌کانم نیشانی که‌س نه‌ده‌م و له‌و ناخۆشیه‌ی که‌ دۆینێ هه‌سته‌کانمی له‌رزاند و وه‌ گریانی خستم خه‌ڵک ئاگادار نه‌که‌مه‌وه‌...... به‌ڵام وتم گریانیان داناوه‌ بۆ ده‌ربڕینی و فرمێسکیش بۆ هاتنه‌ خوارێ به‌سه‌ر گۆناکانم دا کاتێک دڵم پڕه‌، چۆن ده‌توانم پێ بکه‌نم کاتێک گریان حه‌شاری داوم؟

وه‌فا

2006-10-27T16:05:00.000+02:00

ده‌زانم پیاوی له‌ تۆ جوانتر زۆرن، ده‌زانم پووڵت نیه‌ و ناتوانی هیچم پێشکه‌ش که‌ی، ده‌زانم دوری و له‌ دوریشدا سه‌خته‌ ڕاگرتنت. ده‌زانم مرۆڤه‌کان تێ ناگه‌ن عاشقی پیاوێکی هه‌ژاری نه‌زۆرجوانی نه‌ زۆر باڵابه‌رزی نه‌ زۆر ده‌وڵه‌مه‌ندی به‌ هه‌زاران کیلۆمێتر له‌ تۆ دووری ئه‌وبه‌ری ده‌ریاکان یانی چی..... ده‌زانم ئه‌وه‌ش وه‌ک زۆر شتی تر ناخۆشه‌ و سه‌خته‌ و ده‌بێ به‌ وره‌ترین کچه‌ کوردی جیهان بم بۆ خۆشویستنی تۆ..... به‌ڵام زۆر خۆشه‌ خۆشویستنت......له‌ویش خۆشتر شانازی به‌ وه‌فاداری 2 ساڵ و نیوه‌مان

نابێ وابێ، به‌ڵام وایه‌

2006-10-27T15:55:00.000+02:00

ئه‌گه‌ر لێ گه‌ڕێین هه‌روا بچێته‌ پێش ، هه‌موو شتێک به‌ خراپه‌ ساز ده‌بێت و به‌ هه‌ڵه‌ درێژه‌ی ده‌بێ و به‌ بێ یاساییش کۆتایی دێت ........هه‌موو شتێک به‌ بێ ئه‌وه‌ی وابێ بۆمان ئاسایی و یاسایی ده‌بێ و پێمان واده‌بێ، ده‌بێ وابێ و نابێ واش بێ

.+.

2006-10-25T16:42:00.000+02:00

ئایه‌توڵا مه‌کارمی شیرازی وه‌ک هه‌موو ئه‌و مه‌لایانه‌ی له‌ نێوی دین به‌ مه‌به‌ستی چه‌وساندنه‌وه‌ی مرۆڤ به‌ گشتی و ژن به‌ تایبه‌ت که‌ڵک وه‌رده‌گرن و وه‌ک هه‌موو ئه‌و مرۆڤه‌ دیکاتۆر و خوێن مژانه‌ی وا له‌ نه‌خوێنده‌واری و بێ ئاگایی و خورافات په‌رستی کۆمه‌ڵگاکان سوود وه‌رده‌گرن و ده‌سه‌ڵاتخوازیان به‌سه‌ر کۆمه‌ڵگاکان دا ده‌سه‌لمێنن ، قسه‌ ده‌کا.

ئه‌وڕۆ ئایه‌توڵا مه‌کاریمی شیرازیه‌، دۆینێ ، خومه‌ینی و شا و چه‌ند حیزبێکی سیاسی بوون و سبه‌ینێش که‌سانێکی تر. ئێمه‌ و ژیانی ئیمه‌ و داهاتوومان به‌و وتانه‌ که‌ ته‌نیا وته‌ نین و ئیدۆئۆلۆژیه‌کی ماڵوێرانکه‌ره‌ن له‌ مه‌ترسی داین. یه‌که‌م مه‌ترسیش ده‌که‌وێته‌ سه‌ر ئه‌و توێژه‌ی له‌ هه‌موو ئه‌وانی تر لاوازترن و زوڵمیان لی ده‌کرێ .......... وه‌ک هه‌میشه‌ ژنان یه‌که‌م قوربانین ، دوایه‌ش منداڵان.

شتێکی زۆر سه‌رسووڕهێنه‌ر ئه‌وه‌یه‌ که‌ بۆ ئه‌و قسه‌ بێ سه‌ر و بن و پڕ له‌ ترس و ڕق و قین و ئاژاوانه‌ به‌ڵگه‌ی زانستیش دێننه‌وه‌.

دۆینێ ده‌یانگووت خه‌ته‌نه‌ی کچان بۆ ئه‌وه‌یه‌ له‌ بواری خاوێنیه‌وه‌ یارمه‌تی به‌ ژن ده‌دا یان بۆ کاتی منداڵ بوون باشه‌ ، ژن زووتر لێ ده‌بێته‌وه‌ یان هه‌زار شتی تر. ئه‌وڕۆ ده‌ڵێن مێشکی ژن لای چه‌پی باشتر له‌ لای ڕاستی کار ده‌کا و بۆ ئه‌نجامی کاری قورس یان بۆ کارێک که‌ پێویستی به‌ فۆکووس هه‌بێت وه‌ک ڕیازی و فیزیک ، تواناییان له‌ پیاو که‌متره‌.

ئیستاش دیسان مه‌کارێمی شیرازی باسی ئه‌وه‌ ده‌کا که‌ ژنان له‌ ده‌روونیان دا ماوزخیزم یان خۆئازاریان هه‌یه‌ و به‌ کووتانی پیاو چاک ده‌بنه‌وه‌.. ئێره‌
.

زۆر سه‌یره‌ مه‌لا، بۆیان ده‌رکه‌وتووه‌، بۆ وته‌ و ئیدۆئۆلۆژیه‌کانیان پێویستیان به‌ هێنانی به‌ڵگه‌ی زانستیه‌. به‌ڵام ئایا دیسان وه‌ک جاران ژنان و پیاوانی ئه‌وڕۆ باوه‌ڕیان پێ ده‌که‌نه‌وه‌ و به‌ ده‌ستی خۆیان داهاتوویان ڕه‌ش ده‌که‌ن وه‌ک تا ئێستا کردوویانه‌ یان که‌مێک زیاتر له‌ مه‌کارێمه‌کان و کارناسه‌ زانستیه‌کانیان بیر ده‌که‌نه‌وه‌؟

هۆلۆکاست

2006-10-23T16:22:00.000+02:00

له‌ رۆژنامه‌ی سانفرانسیسکۆ کرۆنیکل ڕێکه‌وتی یه‌ک شه‌مۆ 8 ی ژانویه‌ی 2006 دا
‌ وتارێکم به‌ نێوی "ره‌ت کردنه‌وه‌ی هۆلۆکاست ‌ له‌ لایه‌ن ئێرانه‌وه شتێکی تازه‌ نیه‌.‌" وه‌رگێراوه‌ته‌وه‌ ,که‌ به‌ قه‌ڵه‌می ئێدوین بلاک نووسراوه‌,زۆر خاڵی نادیاری ئه‌رکی ئێران له‌ هۆلۆکاست باس ده‌کا.

مه‌حمودی ئه‌حمه‌دی نیژاد, ئه‌گه‌ر ته‌نیا نیوه‌ نیگایه‌ک بخاته‌ سه‌ر ڕابردوو و مێژووی وڵاته‌که‌ی, بۆی ده‌رده‌که‌وێ که‌ ئێران و ئیرانێکان له‌ کاتی خۆی به‌ لایه‌نگری له‌ هیلتێر له‌گه‌ڵ هۆلۆکاست په‌یوه‌ندیان هه‌یه و‌ هه‌روه‌ک هه‌موو جیهانی ئیسلامیش له‌ ژێر ده‌سه‌ڵاتی ئه‌وکاتی موفتی گه‌وره‌ی ئورشه‌لیم دابوون.

ئێران له‌ ساڵه‌کانی پێش شه‌ڕی جیهانی دووهه‌م دا, ئاژانسه‌کانی نازی و گێشتاپۆی بانگێشتنی تاران کرد, قه‌ولی ئه‌وه‌یان به‌ هیتلێر دا که‌ له‌ تاران وه‌ک شوێنێکی بناغه‌یی له‌ ڕۆژهه‌ڵاتی ناوه‌ڕاست دژ به‌ ئینگلیس و ناوچه‌ جووله‌که‌ نشینه‌کان که‌ڵک وه‌ربگرن.

کلیلی ئه‌و په‌یوه‌ندیانه‌ له‌ نێوان ئاڵمان و ئێرانی ئه‌وکات, که‌سێک بوو به‌ نێوی " فریتز گرۆبا" که‌ بێرلین ناردبووی بۆ ڕۆژهه‌ڵاتی ناوه‌ڕاست و دوایه‌ نێوی "لۆرانسی ئاڵمانیان" له‌سه‌ر نا, چوونکه‌ قه‌ولی ده‌وڵه‌تێکی پان ئیرانسیتی دابوو به‌ موسوڵمانه‌کان که‌ له‌ کازابلانکاوه‌ هه‌تا تاران درێژه‌ی ده‌بێت.

په‌یوه‌ندیه‌کانی نێوان ئاڵمان و ئێران, کاتێک زۆرتر گه‌شه‌ی کرد که‌ هیتلێر له‌ ساڵی 1933 ده‌سه‌ڵاتی وه‌ده‌ست خست.له‌وکاته‌دا نه‌ته‌وه‌ی ژێر ده‌ستی "ره‌زا شا" نێوی" پێرسیا "بوو. شا یه‌کێک له‌و که‌سانه‌ بوو وا لایه‌نگری هیتلێر و نازیسم و چه‌مکی" ڕه‌گه‌زی ئاریایی" ده‌کرد و هه‌روه‌ها پێی وابوو که‌ ڕایش بۆ کێشانه‌وه‌ی ده‌ستی ئینگلیس له‌ نه‌فتی ئێران یارمه‌تی ئێران ده‌دا

بیری گۆڕینی نێوی ئێرانیش له‌ "پێرسیاوه‌ "بۆ ئێران,‌ هه‌ر به‌ کاریگه‌ری وه‌رگرتن له‌ رایشی سێهه‌م له‌ ساڵه‌کانی 1935 دا ڕووی دا.ئێرانیش به‌ مانای شوێنی ژیانی خه‌ڵکی ئاریایی نیژاده‌ که‌ له‌ نیژادی هێند و ئوروپاییه‌وه‌ دێن و نازیه‌کانیش هه‌ر له‌سه‌ر ئه‌و باوه‌ڕه‌ بوون.

سفاره‌تی ئێران له‌ ئاڵمانیش, په‌یماننامه‌یه‌کی ئابووری و سیاسی له‌گه‌ڵ ده‌وڵه‌تی هیتلێر ئیمزا کردبوو که به‌رپرسی بانکه‌کانی ئه‌وکاتی ئاڵمان به‌ نێوی "جالمار ساشت" نوێنه‌رایه‌تی هیتلێری کرد و به‌ پێی ئه‌و په‌یماننامه‌یه‌ ئێران ده‌بوو به‌ پارێزه‌ری به‌رژه‌وه‌ندیه‌کانی نازیسم له‌ ناوچه‌دا.

که‌مێک دوای ده‌ستپێکردنی شه‌ڕی جیهانی 2 له‌ ساڵی 1939 دا ,موفتی ئورشه‌لیم په‌یوه‌ندی سیاسی خۆی له‌گه‌ڵ هیتلێر زۆرتر کرد و بۆ فرۆشی نه‌فتی عێراق به‌ سوودی بزووته‌نه‌وه‌ عه‌ڕه‌بی و ئیسلامیه‌کان که‌ دژ به‌ جووله‌که‌کان له‌ ڕۆژهه‌ڵاتی ناوه‌راست و له‌ ڕۆژهه‌ڵاتی ئوروپا چالاک بوون، ستراتێژیه‌کی هاوبه‌شی له‌گه‌ڵ هیتلێر پێک هێنا.

له‌ شه‌ڕی جیهانی دووهه‌م ئێران بوو به‌ شوێنی ده‌سه‌ڵاتی ئاژانسه‌کانی" گێشتاپۆ".به‌ که‌ڵک وه‌رگرتن له‌ ئیران نازیه‌کان توانیان له‌ به‌غداش ده‌سه‌ڵات بگرن و پاش ئه‌وه‌ی "چێرچیل" دوباره‌ له‌ عێراق ده‌سه‌لاتی گرته‌وه‌ ده‌ست، نازیه‌کان له‌ ژوئه‌نی 1941 له‌ عێراق ڕۆیشتن و هێزی هه‌وایی نازیه‌کان بۆمبارانی باکووری عێراقیان کرد و ئێرانیان وه‌ک پایگا بۆ گه‌ڕانه‌وه‌ی خۆیان هه‌ڵبژارد.

له‌وکاته‌‌ش دا موفتی گه‌وره‌ی ئورشه‌لیم ئه‌وکاره‌ی ئێرانی ستاییش کرد و داوای له‌ هه‌موو موسوڵمانان کرد که‌ دژی جووله‌که‌ و هێزی ئینگلیسی ڕاوه‌ستن.موفتی ئورشه‌لیم له‌ رادیۆ و ڕۆژنامه‌کانی تاران, ڕایگه‌یاند که‌ ده‌بێ ئاواره‌ جووله‌که‌کان نه‌نێرن بۆ فه‌له‌ستین و بیاننێرن بۆ سێلوله‌ گازه‌کانی وڵاتی له‌هێستان.

له‌ هاوینی 1941 دا موفتی به‌ پشتیوانی ئه‌رتێشی ئێران و ڕێبه‌رانی ده‌وڵه‌تی ئێران هه‌موو ئه‌و بڕیارانه‌ی وا له ‌مه‌ڕ بریتانیایه‌کان و جووله‌که‌کانی عێراق ئیجرا کرابوو له‌ ئێران خستیه‌ ئاراوه.‌

په‌یماننامه‌کانی نێوان موفتی و نازیه‌کان ئه‌وه‌ بوو که‌ نه‌فتی ئه‌و وڵاته‌ موسوڵمانانه‌ به‌ نازیه‌کان بفرۆشترێ و له‌ به‌رابه‌ری دا جووله‌که‌کان بۆ ڕۆژهه‌ڵاتی ئوروپا راگوێسترێن و نازیه‌کانیش پشتیوانی ده‌وڵه‌تێکی عه‌ڕه‌بی بکه‌ن.

موفتی, بڕیاری هه‌ڵوه‌شاندنه‌وه‌ی هه‌موو په‌یماننامه‌ نه‌فتیه‌کانی نێوان وڵاته‌ موسوڵمانه‌کان و کۆمپانیه‌ ئینگلیسیه‌کانی دا.

له‌ ئۆکتۆبری 1941 ,ده‌وڵه‌ته‌کانی ئینگلیس و سۆڤیه‌ت ,هۆشداریان به‌ ئێران دا که‌ چی تر لایه‌نگری نازیه‌کان نه‌که‌ن.چه‌ند مانگ دوایه هه‌موو وه‌زیران و ژێنێراڵه‌کانی لایه‌نگری نازیسم له‌ ئێران گیران و کوڕی شایان هێنایه‌ سه‌ر کار.موفتیش په‌نای هێنا بۆ سفاره‌تی ئیتالیا و هه‌ر له‌وێش به‌ شێوه‌یه‌کی نامه‌علوم مرد.

کاتێک که‌ موفتی بۆ یه‌که‌م جار ڕووی کرده‌ بێرلین, یه‌که‌م کتێبی خۆی به‌ نێوی "بۆرۆ" بڵاو کرده‌وه‌ و له‌ رادیۆ بێرلینیش به‌رنامه‌یه‌کی تایبه‌تی هه‌بوو.هه‌روه‌ها هه‌وڵی دا دژی جووله‌که‌کان قسه‌ بکا که‌ له‌ هه‌موو رادیۆیه‌کی پایته‌خته‌کانی ئوروپا دا بڵاو ده‌بۆوه‌ و وه‌ک که‌سێکی "پان ئیسلامیست" پشتیوانی له‌ نازیسمه‌کان ده‌کرد.

ئه‌و که‌سه‌ ,هه‌موو موسوڵمانانی جیهانی بانگێشتن ده‌کرد بۆ ئه‌وه‌ی جووله‌که‌کان له‌ هه‌ر جێگایه‌کی جیهان ده‌بینن بیانکوژن. هه‌روه‌ها له‌ خوتبه‌ی نوێژی هه‌ینی تاران ,به‌ خه‌ڵکی ده‌گووت که‌ له‌ ئاسمان ئه‌ڵڵا خوداتانه‌‌ و له‌سه‌ر ئه‌رزیش ئادۆلف هیتلێر.

مفتی سێ گروپی له‌ ئیسلامیه‌" ئێس ئێسه‌کان" ساز کرد که‌ له‌ "بووسنی" بریتی بوون له‌ 30 هه‌زارکه‌س ,له‌ ئیرانیش که‌سانێکی داوته‌له‌ب له‌گه‌ڵیان بوون.
نازیه‌ ئێرانیه‌کان ,له‌گه‌ڵ گروپه‌ ئیسلامیه‌ ئیس ئێسه‌کانی تر ,له‌ ژێر‌ چاوه‌دێری ڕاسته‌وخۆی" هه‌نریش هیملێر" زۆر کاری به‌ربه‌ر و وه‌حشیانه‌یان دژی جووله‌که‌کان و خه‌ڵکی تر له‌ بۆسنی ئه‌نجام دا.یه‌کێک له‌ شۆعبه‌کانی ئه‌و گروپه‌ "به‌شی هاندشار"له‌ ئێران بوو.

ئێران و ڕێبه‌رایه‌تی ئه‌وکاتی ئێران, نه‌ ته‌نیا له‌ هۆلۆکاست دا, به‌ڵکوو ناڕاسته‌وخۆ له‌ ڕاگوێستنی جووله‌که‌کانی ئێران و عێراق و ڕه‌فتاری نیژادپه‌ره‌ستانه‌ی دژی ئه‌وانیش دا, به‌شداربوون.

هه‌زاران جووله‌که‌, له‌ سنووره‌کانی ئێرانه‌وه‌, له‌و ماوه‌یه‌ی که‌ هۆلۆکاست ڕووی ده‌دا ,به‌ره‌و سێلوله‌کانی مه‌رگ ڕاگوێستران و له‌ ماوه‌ی پاش هیتلیریش دا ,کاتێک ڕێبه‌رایه‌تی عه‌ڕه‌به‌کان به‌ تایبه‌ت له‌ عێراق درێژه‌یان به‌ ڕوانگه‌ی ئانتی جووله‌که‌ بوونی خۆیان ده‌دا ، ئێرانیش لایه‌نگری ئه‌وانی ده‌کرد.

کاتێک شای ئیران له‌ حکوومه‌ت هاته‌ خوارێ, ئێران بوو به‌ یه‌کێک له‌ ناوه‌نده‌کانی ئۆرگانیزاسیۆنی جیهانی هۆلۆکاست و له‌ بواری مه‌زهه‌بی و سیاسیه‌وه‌ش باسێکی دژی ئیسرائیل و دژی جووله‌که‌کان هه‌ر به‌رده‌وام بوو.

له‌ باسه‌ زانکۆییه‌کان و هه‌روه‌ها له‌ رادیۆ و ڕۆژنامه‌کانی ئه‌وکاتدا دا, باس له‌وه‌ ده‌کرا که‌ جووله‌که‌کان به‌ هیچ شێوه‌یه‌ک ,له‌ هۆلۆکاست دا زووڵمیان لێ نه‌کراوه‌ یان ژێنۆسایدی جووله‌که‌ جێگای متمانه‌ نیه.

بۆ ماوه‌یه‌کی زۆر, ئێران په‌نای ده‌برد به‌ باسی زانکۆیی و تاریخی له‌سه‌ر هۆلۆکاست. بۆ نموونه‌ له‌ ساڵی 2000 یش نووسه‌رێکی سویسی به‌ نێوی "یورگێن گراف" که‌ به‌ هۆی ئه‌وه‌ی هۆلۆکاستی ڕه‌ت کردبۆوه‌ ,15 مانگ زیندانی کرا. له‌ لایه‌ن ئێران وله‌ لایه‌ن زانکۆیه‌کی ئێرانه‌وه‌ بۆ قسه‌ کردن له‌سه‌ر کتێبه‌که‌ی و ڕه‌ت کردنه‌وه‌ی هۆلۆکاست بانگێشتن کرا.

له‌ مه‌ی 2000 دا, سفاره‌تی ئێران له‌ ویه‌ن, بانگێشتنی که‌سێکی تری ئوتریشی کرد بۆ قسه‌کردن له‌سه‌ر درۆبوونی هۆلۆکاست .‌ نێوی"ڤۆلفگانگ فرۆهلیچ" بوو که‌ بیرێکی ئانتی هۆلۆکاستی هه‌بوو و ده‌یگووت که‌ به‌ڵگه‌کان ده‌ڵێن که‌ هیچ جووله‌که‌یک له‌ هۆلۆکاست و له‌ سێلووله‌کانی گازی ئه‌وکات دا نه‌کوژراون.

هه‌روه‌ها چه‌ند ساڵ پێش, نزیکی 600 رۆژنامه‌ڤان و 160 ئه‌ندامی پارلێمانی ئه‌وکاتی ئیران ئیمزایان کۆ کرده‌وه‌ و پشتیوانیان له‌ که‌سێکی فه‌رانسه‌وه‌ی به‌ نێوی "ڕۆژێ گارودی" کرد که به‌ هۆی نووسینی کتێبێک که‌ باسی ئه‌وه‌ی کردبوو که‌ هۆلۆکاست درۆ بووه ,‌ به‌ 40 هه‌زاردۆلار جه‌ریمه له‌ لایه‌ن ده‌وڵه‌تی فه‌رانسه‌وه‌‌ مه‌حکووم بوو ‌. کاتێک گارۆدی چوو بۆ ئێران ڕێبه‌ری ئه‌وکاتی ئێران "سه‌ید عه‌لی خامنه‌یی" پێشوازیه‌کی زۆری له‌ کاره‌که‌ی کرد و پشتیوانی خۆی له‌وکاره‌ی ئه‌و ده‌ربڕی.

.ئێران ئه‌رکی ڕێبه‌رایه‌تی له‌ نێو دڕامی هۆلۆکاست به‌ڕێوه‌ بردوه,‌ هه‌ربۆیه‌ ده‌خوازی ئه‌و شته‌ ئینکاربکا

ئیدۆئۆلۆژی

2006-10-19T17:42:00.000+02:00

ده‌ه‌ڵێن ئیدۆئۆلۆژی مرۆڤ زۆر دڵڕه‌ق ده‌ه‌کا.ده‌ڵێن ئیدۆئۆلۆژی چاوی مرۆڤه‌کان کوێر ده‌کا.ده‌ڵێن ئیدۆئۆلۆژی دوو برا ده‌کاته‌ دوژمنی یه‌ک و دیسان ده‌ڵێن ئیدۆئۆلۆژی که‌سایه‌تی مرۆڤ تێک ده‌ه‌شکێنێ

منیش له دڵی خۆم دا ده‌ڵێم ئێمه‌ زۆر شت ده‌که‌ین که‌ بۆخۆمان پێمان وایه‌ نابێ بیکه‌ین

ڕه‌ه‌نگه‌ مرۆڤه‌کان وه‌ک من تینووی تاقی کردنه‌وه‌ بن.... تاقی کردنه‌وه‌ی ئه‌و شتانه‌ی پێیان وایه‌ هه‌ڵه‌ن به‌ڵام ده‌بێ بۆ زانینی هه‌ڵه‌ بوونیان تامیان بکه‌ن. ئه‌زموونیان بکه‌ن.........پاش ماوه‌یه‌ک تاقی کردنه‌وه‌ له‌ بیریان ده‌چێ ئه‌وه‌ ته‌نیا تاقی کردنه‌وه‌یه‌ و نابێ ببێته‌ خو یان به‌شێک له‌ ژیان

...باران ده‌بارێ ، عه‌رزی ده‌شۆرێ

2006-09-16T15:19:00.000+02:00

من ئیدی وه‌ک منداڵیم به‌ نم نمی هیچ بارانێک ته‌ڕ نابم. من ئیدی وه‌ک چکۆله‌ییم به‌ بۆنی خۆڵی ته‌ڕی پاش هیچ بارانێک مه‌ست نابم. من ئیدی چی تر بیر ناکه‌مه‌وه‌ که‌ ژیان به‌ نم نمێک سه‌وز ده‌بێته‌وه‌ ، من ئیدی چی تر پاش باران چاوه‌ڕوانی کۆلکه‌ زێرینه‌ نابم

مردنی پێش له‌ دایک بوون

2006-08-25T15:12:00.000+02:00

هه‌ر له‌ یه‌که‌م کاته‌کانی سازبوونی،خۆی به‌ قوربانی ده‌کرد.هێش و ئازار و گریان و ئاواته‌کانی تێکه‌ڵ 9 مانگ چاوه‌ڕوانی و هیوا کردبوو.پاش 9 مانگ پێ ڕاگه‌یشتن و به‌ ده‌وری به‌رهه‌مه‌که‌ی دا هاتن ژان دایگرت....له‌گه‌ڵ ترس و هیوا و ژان و گریان ،ده‌نگی هاوار تێکه‌ڵ بوو

چاوه‌ڕێی بیستنی ده‌نگی ده‌کرد، چاوه‌ڕێی بزووتنه‌وه‌ی لێوی په‌رستاره‌که‌ی ده‌کرد خه‌به‌ری له‌ دایک بوونی ئاواته‌که‌ی داتێ....به‌ڵام بێ ده‌نگیه‌کی خه‌فه‌ت هێنه‌ر هێرشی هێنابوو.ئاواته‌که‌ی ، به‌رهه‌مه‌که‌ی ، کۆرپه‌که‌ی پێش ئه‌وه‌ی له‌ دایک بێ مردبوو

په‌پووسلێمانکه‌

2006-08-05T16:46:00.000+02:00

به‌یانان له ‌ژووره‌ سارد و دووکه‌ڵاویه‌که‌ هه‌ست به‌ سه‌رما ده‌که‌م..دڵم ناخۆشه‌ و گریانم دێ.په‌پوو سڵه‌مانکه‌یه‌ک ماڵی ون کردۆ و به‌ دندووکی له‌ شووشه‌ی په‌نجه‌ره‌که‌م ده‌دا و به‌ زمانی خۆی ده‌ڵی هه‌سته‌ .به‌یانان بۆته‌ هۆی دڵم خۆشیم .‌ ده‌ترسم دانی بۆ دانێم و یان ئه‌و یان من عاده‌ت به‌وی دیکه‌ بکه‌ین و به‌ ڕۆیشتنی یه‌کمان چرکه‌کان بۆ ئه‌وی تر ناخۆشتر له‌ چرکه‌کانی جاران بن

ڕه‌نگی هیچ گووڵێک له‌ ڕه‌نگی ئه‌و ناچێ

ئه‌وڕۆش دوور رۆیشتم به‌ڵام هیچ گولێکم نه‌دیته‌وه‌ بۆ ساته‌کانی ته‌نیاییم که‌ که‌مێک ڕه‌نگی له‌ ڕه‌نگی گوڵه‌که‌ی ترم بچێ....ڕه‌نگی هیچیانم به‌ دڵ نه‌بوو..... پاش هه‌ر ماڵ و کۆچێک گوڵه‌که‌ت له‌ ده‌ست بده‌ی و ئیدی وه‌ک ئه‌و نه‌بینیه‌وه‌ کاره‌ساته‌

منی دڵۆپه‌ی باران

2006-08-05T16:33:00.000+02:00

من تکه‌یه‌ک بارانم.... ئارام ئارام له‌ سه‌ر په‌ڵه‌ هه‌ورێکی نه‌رم و سپیتر له‌ کولوی به‌فر دێمه‌ خوارێ و ده‌بارێمه‌ سه‌ر باڵای پڕ له‌ فرمێسکی چاوی پیاوێک،له‌گه‌ڵ فرمێسکه‌کان تێکه‌ڵ ده‌بم و له‌ چاوی دا قه‌تیس ده‌مێنم، نه‌ ده‌توانم به‌ جێی بێڵم و نه‌ ده‌شتوانم له‌گه‌ڵ سۆرایی و غه‌می فرمێسکه‌کان خۆڕاگربم...ده‌مێنمه‌وه‌ به‌شکم ورده‌ ورده‌ له‌گه‌ڵ خه‌می ئه‌و و فێرمێسکه‌کان ویشک هه‌ڵگه‌ڕێم

خوشک وبرا

2006-07-28T21:02:00.000+02:00

بێ ده‌نگی قسه‌ ده‌کا....شه‌و ڕووناکه‌....بیابان ده‌ریایه‌ و ماندوویی ده‌حه‌سێته‌وه‌ کاتێک منیش بیرتان لێ ده‌کاته‌وه‌

ئیفاده

2006-07-28T20:48:00.000+02:00

قه‌تی تامی ته‌حویل وه‌رگرتن نه‌کردبوو،به‌ عومری گوێیان بۆ قسه‌کانی ڕانه‌گرتبوو،له‌ ژیانی دا ئاوا ڕێزیان نه‌گرتبوو..... هه‌میشه‌ که‌سایه‌تیان شکاندبوو و قه‌ت نه‌یتوانیبوو خۆی ئه‌وجۆره‌ی که‌ هه‌یه‌ بناسێنێ و ئه‌و جۆره‌ی که‌ هه‌یه‌ خۆشیان بوێ..... ڕۆیشت و ڕۆیشت گه‌یشته‌ وڵاتێکی زۆر دوور...خه‌ڵکه‌که‌ی نه‌یانده‌ناسی...ناسنامه‌یه‌کی سه‌یر و سه‌مه‌ره‌ی بۆ خۆی ساز کرد....به‌ڵگه‌نامه‌یه‌کی سه‌رسووڕهێنه‌ریشی کرده‌ نووشته‌ و به‌ شانی دا کرد...که‌س نه‌بوو لێی بکۆڵێته‌وه‌ بزانێ کێێه‌ و چی کردۆ و چ کاره‌یه‌.....ئه‌وجاره‌یان ته‌فریت بوو به‌ ئیفرات

هه‌موو ڕۆژێ له‌سه‌ر پاشنه‌یه‌کی 10 سانتی که‌وشه‌کانی لووته‌ به‌رزه‌که‌ی به‌ قژه‌ زۆره‌که‌ی پاک ده‌کرده‌وه‌ و عۆقده‌ کۆنه‌کانی به‌ یه‌ک دوو چه‌رخێشی نه‌وه‌د ده‌ره‌جه‌ی هه‌موو ئه‌ندامی ساڕێژ ده‌کردن.... ئیفاده‌ هێرشی هێنابوو

کاروانی ئه‌وین

2006-07-22T15:57:00.000+02:00

ئه‌وین وه‌ک کاروانێک وایه‌ وا پڕه‌ له‌ موسافیر....موسافرێک وه‌ دوای تۆ که‌وتۆ و تۆش وه‌دوای یه‌کی دیکه‌ غارده‌ده‌ی،نه‌ تۆ ئاگات له‌وه‌ی پشته‌وه‌ته‌ و نه‌ ئه‌وی پێشه‌وه‌ ئاگای له‌ غاردانی تۆیه‌...ڕه‌نگه‌ کاروان سالار ئاگای له‌ هه‌موومان بێت

دوو قسه

2006-07-22T15:54:00.000+02:00

منداڵ منداڵ ده‌خوولێمه‌وه‌...سه‌رم گێژ ده‌بێ و ده‌که‌ومه‌ نێو قووڵکه‌یه‌ک....له‌ شتێک ده‌گه‌ڕێم که‌ ئێستا ساز نه‌کراوه‌ و له‌ که‌سێک که‌ ئێستا له‌ دایک نه‌بووه‌! گه‌ورانه‌ ده‌ڕوانمه‌ ژیان،ورد ده‌بمه‌وه‌ له‌ هه‌موو هه‌ناسه‌یه‌ک.....دیسان ده‌مهه‌وێ شتێک بسه‌لمێنم وا بوونی نیه

ته‌نیا چاکه‌ ده‌مێنێته‌وه‌ و خراپه‌ ده‌بێته‌ دووکه‌ڵ.... ئه‌وه‌ قسه‌ی نه‌نکم بوو،جووابی ڕق و قین به‌ خراپه‌ مه‌ده‌وه‌..ئه‌وه‌ش قسه‌ی دایکمه‌... بابیشم ده‌یگووت خۆت به‌،ڕق و خراپه‌ش تاقی که‌وه‌ ،هیچ شتێک له‌ خۆڕا ساز نه‌کراوه‌،ڕه‌نگه‌ ئه‌وانیش به‌ کاری ساته‌کانی ژیانت بێن

تاڤگه

2006-07-09T17:01:00.000+02:00

خه‌تێک له‌ ئاوی سارد و سپی دێ و چرکه‌کان به‌ خێرایی ده‌پێوێ،قه‌تره‌کان یه‌ک ده‌گرن و له‌گه‌ڵ یه‌ک گرتنه‌وه‌ش دا خۆیان به‌رده‌ده‌ن،ئاو و ئۆکسیژێن وچرکه‌ و ده‌نگی ئاو و به‌رد تێکه‌ل ده‌بن و ئۆرکێستێک ساز ده‌که‌ن،ده‌نگی پڕیشکه‌ و هاژه‌ ده‌بیستی و له‌ پڕدا به‌رده‌بیه‌ خوارێ

ڕێگا

2006-07-08T11:58:00.000+02:00

ڕۆژێکیان من و تۆ و خه‌ونێک به‌ یه‌که‌وه‌ ڕێگایه‌کمان پێوا و ویستمان له‌گه‌ڵ یه‌ک به‌ یه‌که‌وه‌ به‌ کۆتایی ڕێگاکه‌ بگه‌ین.بایه‌کی توند هات و هه‌تا توانی وه‌رزی سه‌رما و هه‌ڵله‌رزینی کرده‌ دیاریمان،هه‌ورێکی چڵکن گه‌یشت و به‌ هه‌موو هێزی خۆی به‌فر و بارانی پێداکردین،ده‌نگێکی شه‌یتانیش خۆی گه‌یاندمان و سرته‌ی ڕه‌شی له‌ گوێمان ئاخنی.....ئه‌وکات ڕێگاکانمان جوودا بۆوه‌،تۆ به‌ لای شاخ و کێو و به‌رزایی دا ڕۆیشتی و من ڕووبار و ده‌شتاییم هه‌ڵبژارد.ئێستا نازانم من به‌ره‌و کوێ ده‌چم و تۆ کۆتایی ڕێگاکه‌ت کوێیه‌....ئه‌وه‌نده‌ ده‌زانم ئێستاکه‌ من و تۆ نه‌ له‌ یه‌ک ده‌گه‌ین و نه‌ پێک ده‌گه‌ینه‌وه‌. که‌ وابوو لێی گه‌ڕێ با وابێت و نه‌گۆڕدرێ ئه‌و جیاییه‌.....ڕه‌نگه‌ ئه‌وه بووداکان فێری فیلۆسۆفیه‌کی تازه‌تر بکا

2006-07-03T02:49:00.000+02:00

بابه‌،بابه‌ بابه

‌ بیرت ده‌که‌م.ئێستا له‌ هه‌موو کاتێک زۆرتر و له‌ هه‌موو ساتێک قوولتر بیرت ده‌که‌م و خۆشم ده‌وێی

بابه‌ بابه‌ بابه‌

نازانم بۆچی ئه‌وه‌نده‌ خه‌مناکم.هیچ شتێک ناتوانێ دلم خۆش بکا .ئیدی ئاسمانی شینی هیچ وڵاتێک ناتوانێ بمڕێفێنێ،گه‌رمای هیچ هه‌تاوێک ناتوانێ تینوویه‌تی له‌شم بشکێنێ.هیچ پیاوێک ناتوانێ دڵم بڕفێنێ.هیچ ژنێک ناتوانێ ببێته‌ ده‌سته خۆشکی گیانی گیانیم.هیچ سروه‌تێک ناتوانێ ده‌وله‌مه‌ندم کا و هیچ په‌ڕتووکێک ناتوانێ چیشم بداتێ

بابه‌ گیان نازانم بۆ وام لێ هاتووه.........هه‌رچه‌ند ده‌گه‌ڕێم هیچ شوێنێک نابینمه‌وه‌ بلیتی هاتن بۆ لای تۆم پێ بفرۆشێ...هه‌رچی ده‌گه‌ڕێم ناتوانم ئادرێسی ماڵه‌که‌ت بدۆزمه‌وه‌.ژیان به‌ بێ تۆ هیچ خۆش نیه..... ئیدی ئه‌وه‌ چوارساڵه‌ زۆری له‌ خۆم ده‌که‌م

ده‌نکی ته‌سبێح

2006-06-15T19:05:00.000+02:00

ده‌نکی ته‌سبێحی بابه گه‌وره ئه‌وه‌نده‌ی به ده ستی هێناوه‌و بردۆ ڕه‌نگی نه‌ماوه و سپی بۆته‌وه
ڕه‌نگی ئێمه‌ی مرۆڤیش ئه‌وه‌نده‌ی شه‌ڕ و تووڕه‌یی و خه‌م و حه‌سره‌ت و ناته‌بایی ڵێڵ بۆته‌وه و کۆن و ڵێڵ دیاره وه‌ک ده‌نکه
ته‌سبێحه‌کانی بابه گه‌وره

*****
پێچه‌وانه بوون

به پێچه‌وانه‌ی که‌سێکه‌وه قسه کردن و هه‌ڵسووکه‌وت کردن ئه‌گه‌ر سروستی بێت پیرۆزترین شته چوونکه خۆتی.به‌ڵام که بوو به لاساری هه‌م له خۆت و هه‌میش له‌وانی تر دوور ده‌که‌ویه‌وه

هێلانه

2006-06-15T19:02:00.000+02:00

له سه‌ر زێدێکی سه‌وز،به خشتی دارین و خۆڵین هێلانه‌یه‌ک ساز کراوه .... تێیدا دوو مه‌ل خۆیان کۆ کردۆته‌وه و بۆنی یه‌ک ده‌که‌ن...هێلانه‌که پڕه له په‌ڕی سپی و ده‌نکی گێلاس و بۆنی ئه‌رخه‌وان. له سه‌ر زیدێکی سه‌وز، هێلانه‌یه‌ک جێگای حه‌سانه‌وه‌یه... ده‌توانی له‌وێ پاڵت به ده‌سته نوێنێکی شین ده‌یه‌وه و پیاڵه گڵه شینه‌که‌ت پڕ که‌ی له چایه‌کی گه‌رم و خۆش بۆن.ده‌توانی له په‌نجه‌ره‌ چکۆله که‌یه‌وه چاو له باخچه‌یه‌کی پڕ له گوڵه باخ که‌ی و بانگی په‌پووله‌یه‌ک که‌ی بێ و به باڵه‌کانی باوه‌شێنی تۆ و گوڵه باخ بکا.ئێستا،ئه‌وڕۆ ،له هه‌موو کاتێک زیاتر پیویستم به هێلانه‌یه‌که تێیدا نازی خۆم بکێژم...... له نێو ئه‌و قه‌ره‌باڵغه دا خۆم له بیر چۆته‌وه و ناتوانم نازی خۆم بکێشم

2006-06-08T21:02:00.000+02:00

ڕۆژێک دادێ هه‌موو چۆله‌که‌کان له‌وه‌ی هه‌یه به‌رزتر ده‌فڕن.هه‌موو ئاسمانه‌کانیش له‌وه‌ی که‌ هه‌ن شینتر دیار ده‌بن.ڕۆژێک دادێ قسه دووپات کردنه‌وه‌ ده‌بێته ساز کردنه‌وه و له سه‌ر خۆڵه‌مێشه‌کان داهێنانه‌وه.به‌ڵام دڵنیا نیم ڕۆژێک بێت و من بتوانم ئه‌و ڕۆژانه ببینم

2006-05-13T11:09:00.000+02:00

له ڕه‌نگه‌کان و پوڵه‌که‌کان دا جیهانێکی ئارام و پڕ له ئاشتی و خه‌شه‌ویشتی مرۆڤ و زێدیان ده‌کرده میوانی چاوه‌کانی خۆیان و ئه‌وانی تر.قه‌ت پرسیوتانه بۆچی جلی ژنانی کورد ئه‌وه‌نده کۆلکه‌زێرێنه‌یه؟ڕه‌نگه له جیات وته و هاوار و فرمێسک و پێکه‌نین سرته‌ی ڕه‌نگ و بریقه‌یان هه‌ڵبژاردبێت......ره‌نگه‌کان و فۆرمه‌کان جاری وایه له هه‌‌موو ده‌نگێک و نووسراوه‌یه‌ک جووانتر ده‌رده‌بڕن

چی کوردترت ده‌کا؟

2006-05-10T20:05:00.000+02:00

کابرایه‌کی جوله‌که‌ ده‌ناسم که به ساڵاچووه و زۆر ته‌عه‌سوبی بۆ جوله‌که‌کان و ئیسرائیل هه‌یه!ڕۆژێک لێم پرسی تۆ که زانکۆت ته‌واو کردۆ و ئه‌وه‌نده بیری جوان جوانت هه‌یه بۆچی ئه‌وه‌نده ته‌عه‌سوبت هه‌یه بۆ جوله‌که!گووتی من له کاتی خۆی که نازیه‌کان هاتن بۆ مارسێی(فه‌رانسه) چوارده‌ساڵم بوو و هیچم له جوله‌که بوونی خۆم نه‌ده‌زانی و دایک و بابم هیچیان باس بۆ نه‌کردبووم.... به‌ڵام هاتن و به تاوانی جوله‌که‌ بوون بردیانم بۆ که‌مپی کاری ئیجباری،دور و بێ خه‌به‌ر له دایک و بابم.ئێستا پاش ئه‌و بیره‌وه‌ریه ناخۆشانه بیر له خۆم و جوله‌که‌ بوونی خۆم ده‌که‌مه‌وه..... له راستی دا من پاش ئه‌و که‌مپه کاری ئیجباریه بووم به جوله‌که‌ی راسته‌قینه...... ڕه‌نگه ئه‌وکات وه‌ک جووله‌که له دایک بووم ،چواردد‌ساڵ دوای له دایک بوونی راستیم.
ئێستا که ده‌ڕوانمه ئه‌و قسانه‌ی ده‌زانم -پییێر دوو - پاش شکه‌نجه و ئازاری له‌سه‌ر ئیدانتیته‌ی خۆی بآشتر ناسیوه و له راستی ئازار دیتن و ته‌وهین بیستن و کاری ئیجباری کردوویه به جووله‌که نه‌ک په‌روه‌رده و خانه‌واده‌ی سه‌ختگیر ..... منی کوردیش کاتێک زۆرتر هه‌ستم به کورد بوونی خۆم کرد و پێم له سه‌ر داگرت که له تاران وه‌ک منداڵێکی حه‌فده‌ساڵانی دور له دایک و باب تووشی کچه شیعه‌‌کان و فارسه به‌سیجیه‌کانی -خوابگاه-بووم و له‌وێ ته‌وهین و ئازار و ته‌نیای کردمی به کورد ده‌نا له ماڵی خۆمان و له شاری خۆمان که هه‌موو کورد بوون و خه‌ڵک هه‌موو له خۆت ده‌چوون زۆر هه‌ستم به کورد بوونی خۆم نه‌ده‌کرد.
پێم وایه زیندانی و شکه‌نجه کێشانی کورده‌کان و سه‌رکووت کردنیان زۆرتر ده‌یان کات به کورد و مێتۆدی نازیه‌کان وا ئێستا له لایه‌ن حکومه‌ته‌کانی رۆژهه‌ڵاتی ناوه‌راست دژی کورد که‌ڵکی لێ وه‌رده‌گیرێ زۆرتر هانیان ده‌دا بۆ خه‌بات و تێکۆشان و دۆزینه‌وه‌ی ئیدانتیته و پێ داگرتن له‌سه‌ر کوردبوونیان.